काठमाडौं (हाम्रो खेलकुद) – कोशी प्रदेश र सुदूरपश्चिम प्रदेश एन्फा महिला लिगको अन्तिम चरणका लागि छनोट भएका छन् ।

कर्णाली प्रदेशलाई लिग छनोटमा मंगलबार १–० ले पराजित गरेसँगै सुदूरपश्चिम लिगको अन्तिम चरणका लागि छनोट हुन सफल भएको हो । ५ खेलमा शीर्षस्थानको रहेको कोशीको १३ र सुदूरपश्चिमको १२ अंक छ । अन्तिम खेल अघि नै दुई टोली फाइनल राउन्डका लागि छनोट भएको हो ।

सुर्खेतको कर्णाली प्रदेश रंगशालामा भएको दिनको दोस्रो खेलमा यशोदाकुमारी चिरालले आठौं मिनेटमा गरेको गोल सुदूरपश्चिमका लागि निर्णायक बन्यो ।

त्यसअघि बिहान मधेश प्रदेशले लुम्बिनी प्रदेशलाई ३–१ ले हराएको छ । सबै ६ खेल खेलेको मधेश १० अंकसहित तेस्रो स्थानमा छ । तेस्रो टोली पनि अन्तिम चरणका लागि छनोट हुनेछ । कर्णाली र मधेशमध्ये एउटा टोली लिगको अन्तिम चरणका लागि छनोट हुनेछ । चौथो स्थानको कर्णालीको ९ अअंक छ । गण्डकीको ६, लुम्बिनीको ३ र बागमती अंक बिहिन छ ।

मधेशलाई जित दिलाउन रजनी थोकरले २ गोल गरिन् । रजनीले ३८ औं मिनेटमा गोल गर्दै मधेशलाई अघि बढाईन् । दोस्रो हाफको पहिलो मिनेटमा लुम्बिनीका लागि प्रतिक्षा ठकुरीले बराबरी गोल फर्काइन् ।

७५ औं मिनेटमा रजनीले अर्को गोल गर्दै मधेशलाई पुनः अग्रता दिलाइन् । इन्ज्युरी समयको दोस्रो मिनेटमा अन्जना पुनले अत्मघाती गोल गरेपछि मधेशको गोलअन्तर बढेको हो । छनोट लिगमा सहभागी ७ मध्ये शीर्ष ३ टोली अन्तिम चरणका लागि छनोट हुनेछन् । छनोटमा अबब अन्तिम ३ खेल बाँकी छन् ।