काठमाडौं (हाम्रो खेलकुद) – नेपाली राष्ट्रिय फुटबल टोलीका सदस्य अञ्जन विष्टलाई चाइनिज स्पोर्ट्स पोशाक ब्रान्ड कम्पनी ३६१ डिग्रीले प्रायोजन गरेको छ ।

नेपालको लागि स्पोर्ट्स ब्रान्ड ३६१ का आधिकारिक विक्रेताका प्रमुख कार्यकारी अधिकृत (सिइओ) सरोज कार्की र अञ्जनबीच शनिबार सम्झौतामा हस्ताक्षर गरेका थिए । सम्झौता तीन बर्ष रहने बताइएको छ ।

कम्पनीले अञ्जनलाई तीन वर्षसम्म पोशाक उपलब्ध गराउने छ । सम्झौतको आर्थिक विषयलाई भने गोप्य राखिएको छ ।
सिइओ कार्कीले पहिलो पटक फुटबलमा त्यो पनि अञ्जनसँग सहकार्य गर्न पाउँदा खुसी लागेको बताए । उनले भने ‘हामीले पहिलो पटक फुटबलमा सहकार्य गरेका छौं । अञ्जनसँग सहकार्य गर्न पाउनु हाम्रो लागि खुसीको क्षण हो ।’

कम्पनीले नेपालमा फुटसल, बास्केटलमा यस्ता सहकार्य गर्दै आएको छ । विगत ६ वर्षदेखि पिस पइन्ट कप आयोजना गरिरहेको छ । सम्झौतापछि अञ्जनले अन्तर्राष्ट्रिय कम्पनीसँग सहकार्य गर्दा खुसी भएको बताए । उनले यस्ता प्रायोजक आउँदा फुटबलमै लाग्न प्रेरित गर्ने बताएका छन् । ‘अन्तर्राष्ट्रिय प्रायोजकसँग सहकार्य भएको छ । यसले आगामी करियर बढाउन र फुटबलमै लाग्न थप सहयोग पुर्याउनेछ ।’

सन् २०१४ मा फिलिपिन्सविरुद्ध डेब्यु गरेका अञ्जनले हरि खड्का र निराजन रायमाझीले गरेको १३ गोलको कीर्तिमान बराबर गरेका छन् । दशरथ रंगशालामा भएको लाओसविरुद्ध गोलसँगै उनले कीर्तिमान बराबर गरेका हुन् । चोटका कारण अन्जनले जेठ २४ गते युइए र जेठ २९ गते यमनसँगको खेल गुमाउँने भएका छन् ।