एजेन्सी – प्रशिक्षक जोसे मोउरिन्हो टर्किस शीर्ष डिभिजनको क्लब फेनरबाचे पुगेका छन् । क्लबले सामाजिक सञ्जाल मार्फत मोउरिन्होलाई अनुबन्ध गरेको व्यहोरा सार्वजनिक गरेको हो ।

६१ वर्षीया मोउरिन्होले इस्माइल कार्तललाई प्रतिस्थापन गर्नेछन् । कार्तलले शुक्रबार फेनेरबाचे लिग तालिकामा चिर प्रतिद्वन्दी गालातासाराय भन्दा पछि दोस्रो स्थान हासिल गरेपछि शुक्रबार क्लब छाडेका थिए । लिग सिजनभर एक बार मात्र बेहोर्दै ९९ अंक ल्याएपनि फेनरबाचेले लिग उपाधि गुमाउन पुगेको थियो ।

मोउरिन्ह साढे दुई सिजनको जिम्मेवारीपछि जनवरीमा रोमाले बर्खास्त गरेपछि कुनै क्लबमा आवद्ध रहेका छैनन् ।

चेल्सी, रियल म्याड्रिड र म्यानचेस्टर युनाइटेडका पूर्व प्रशिक्षक मोउरिन्हो च्याम्पियन्स लिग, युरोपा लिग र युरोपा कन्फरेन्स लिग जित्ने एकमात्र प्रशिक्षक हुन् । उनले आफ्नो गृह देश पोर्चुगलमा बेन्फिकामा सुरु भएको २४ वर्षको प्रशिक्षण करियरमा २१ उपाधि जितेका छन् । उनले पोर्टो, इन्टर मिलान र टोटेनहममा पनि प्रशिक्षण गरेका छन् ।

मोउरिन्होको पछिल्लो उपाधि २०२२ मा रोमासँग युरोपा कन्फरेन्स लिगको रूपमा आएको थियो । लगत्तै अर्को सिजनमा रोमा उनकै प्रशिक्षणमा युरोपा लिगको फाइनलमा पराजित भएको थियो ।