सुशिल पन्त क्षेत्री, चितवन
सेन्ट्रल कलेज चितवन जिल्ला ए डिभिजन लिग फुटबल यसै साता सुरु हुने भएको छ।

आयोजक चितवन जिल्ला फुटबल संघले असार १४ गते सुरु हुने लिगमा  सहभागी १३ टोलीलाई‌ दुई समूह विभाजन गरेको  छ ।

सेन्ट्रल टावरमा आज (आइतबार) एक कार्यक्रमकाबीच भएको  विभाजनको समूह ए मा साविक विजेता हनामी भरतपुर फुटबल क्लब (बिएफसी) सँगै नारायणी फुटबल क्लब, एस्ट्रल युथ सोसाईटी, गीतानगर ब्वाईज क्लब, नारायणी मोटर्स युनिक क्लब, पानस युवा क्लब र सौराहा युवा समाज छन् ।

साविक उपविजेता एभरेष्ट क्लब चितवन, माडी ११ फुटबल क्लब, रामपुर फुटबल क्लब रड्स, यात्रा ग्रुप भरतपुर, नारायणगढ फुटबल क्लब र हर्दी युवा समाज समूह बीमा छन् । लिगको उद्घाटन खेलमा साविक विजेता बिएफसी र नारायणी एफसी भिड्नेछन् ।

लिगका खेलहरु भरतपुर ७ कृष्णपुर मैदान र नेपाली प्रहरी शिक्षालय (तालिम केन्द्र) को मैदानमा हुने चितवन जिल्ला फुटबल संघका अध्यक्ष श्री कृष्ण कार्कीले जानकारी दिए । उद्घाटन खेल कृष्णपुरमा हुनेछ ।
साउन ८ गतेसम्म चल्ने प्रतियोगिताको विजेताले ट्रफीसहित १ लाख र दोस्रोले टोलीइले ५० हजार रुपैयाँ प्राप्त गर्नेछ ।

प्रतियोगिताभरको उत्कृष्ट खेलाडीले १० हजार, विधागत उत्कृष्टले ५ तथा म्यान अफ दि म्याचले २ हजार पाँच सय प्राप्त गर्ने संयोजक गोपाल गुरुङले जानकारी दिए । लिगलाई  सेन्ट्रल कलेज अफ भोकेसनल ट्रेनिङ प्रालिले मुख्य प्रायोजन गरेको  छ ।