सुशिल पन्त क्षेत्री,चितवन

सेन्ट्रल कलेज चितवन जिल्ला ए डिभिजन लिग फुटबलमा शुक्रबार सौराहा युवा समाज र पानस युवा क्लब विजयी भएका छन् ।

शारदानगरको मैदानमा पहिलो खेलमा सौराहाले गीतानगर ब्वाइजलाई ३-१ ले हरायो ।

खेलमा सौराहालाई जिताउन सुशील घलानले ३५ औं र ५२ औं मिनेटमा गोल गरे । यस्तै लक्की गायकले २७ औं मिनेटमा गोल गरे । जि ब्वाइजका निश्चल गुरुङले इन्ज्युरी समयमा गोल गरे ।

जितपछि सौराहाले समूह ए मा ५ खेलमा ८ अंक जोड्दै तालिकाको तेस्रो स्थानमा उक्लिएको छ । चौथो स्थानमा झरेको जि ब्वाइजको ४ खेलमा ६ अंक छ ।

सोही समूहको अर्को खेलमा पानसले नारायणी मोटर्स युनिक एफसीलाई २-० ले पराजित गर्यो। पानसको जितमा साहिल सुनारले ५२ औं तथा शिव गुरुङले ५६ औं मिनेटमा गोल गरे ।

जितपछि पानसले ४ खेलमा ९ अंकसहित तालिकाको दोस्रो स्थानमा छ । युनिक भने ४ खेलमा ३ अंकसहित पुछारबाट दोस्रो स्थानमा छ ।

आजको नतिजाले समूह ए रोमाञ्चक बनाएको छ । यो समूहमा हानामी भरतपुर फुटबल क्लब १० अंकसहित तालिकाको शीर्ष स्थानमा छ ।

लिगमा शनिबार पनि दुई खेल हुनेछन् । दिउँसो २:३० बजे नारायणी एफसी र एष्ट्रल युथ सोसाइटी तथा दोस्रो खेलमा दिउँसो ४:३० बजे हर्दी युवा समाज र यात्रा ग्रुपबीच हुनेछ ।

चितवन जिल्ला फुटबल संघको आयोजनामा जारी प्रतियोगिताको मुख्य प्रायोजकमा सेन्ट्रल कलेज अफ भोकेसनल ट्रेनिङ प्रालि रहेको छ ।