काठमाडौं (हाम्रो खेलकुद) – चर्च ब्वाइज युनाइटेडले भुटानको पारो एफसीसँग यसै महिना खेल्ने एएफसी च्यालेन्ज लिग छनोट खेलको टिकट बिक्रीका लागि सम्झौता गरेको छ ।

टिकट बिक्रीका लागि चर्च ब्वाइजले खल्ती एपसँग सोमबार सम्झौता गरेको छ । सम्झौतामा चर्च ब्वाइजका अध्यक्ष टंकलाल राई र खल्तीकी सहायक प्रबन्धक पुजा धामीले हस्ताक्षर गरे । सम्झौता अनुसार टिकटिङ अधिकार चर्च ब्वाईजसँग रहने छ भने खल्ती मार्फत बिक्री मात्र गर्ने भएको हो ।

त्रिपुरेश्वरस्थित दशरथ रंगशालामा साउन २९ गते हुने खेलको टिकट मुल्य समेत निर्धारण भएको छ । साधारण प्यारापिटतर्फ २ सय र भिआपी तर्फ ५ सय रुपैयाँ टिकट दर तोकिएको चर्च ब्वाइजले जनाएको छ।

चर्च ब्वाइजले सहिद स्मारक ए डिभिजन लिग च्याम्पियनको हैसियतमा एएफसीको क्लब प्रतियोगितामा नेपालको प्रतिनिधित्व गर्दैछ । पारो भुटानको लिग च्याम्पियन हो ।

प्लेअफको विजताले एएफसी च्यालेन्ज लिगको समूह चरण खेल्नेछ । यस्तै अर्को प्रारम्भिक छनोट खेलमा अफगानिस्तानको अट्याक एफसी र किर्गिज गणतन्त्रको एफसी अबदिश-अटा खेल्नेछन् ।

समूह चरणका खेलहरू अक्टोबर २६ देखि नोभेम्बर २ मा हुनेछ । यदि समूह चरणका लागि छनोट हुने टोलीले अर्को चरणको सहभागिताका लागि कम्तीमा १ लाख अमेरीकी डलर प्राप्त गर्नेछ । खेलको प्रत्यक्ष प्रसारण हाम्रो खेलकुदले गर्नेछ ।