काठमाडौं (हाम्रो खेलकुद) – ललित स्मृति एन्फा यु-१८ युथ लिगमा बिहीवार संकटा क्लबले सातदोबाटो युथ क्लबलाई पराजित गर्यो ।

मच्छिन्द्र फुटबल क्लब र नेपाल पुलिस क्लबलबीचको अर्को खेल बराबरीमा टुंगिएको छ ।

पहिलाे खेलमा सविनकुमार लुङ्गेलीमगरको ह्याट्रिकसँगै संकटाले सातदोबाटोमाथि ६-० को फराकिलो जित निकालेको हो ।

सातदोबाटोस्थित एन्फा कम्प्लेक्सको मैदानमा संकटालाई जित दिलाउन सोनमछिरिङ होल्मो, अजित चौधरी र हिमेश माझीले समान १ गोल थपे ।

खेलको २० औं मिनेटमा सविनको गोलमार्फत संकटाले अग्रता लिएको थियो । २५ औं मिनेटमा सविनले नै पेनाल्टीमा गोल गर्दै अग्रता दोब्बर बनाए ।

सोनमले २६ औं मिनेटमा गोल गरेपछि संकटा ३-० ले अगाडि रह्यो । ३७ औं मिनेटमा सविनले गोल गर्दै ह्याट्रिक पूरा गरे ।

६० औं मिनेटमा अजितले संकटाका लागि पाँचौं गोल गरे । निर्धारित समय सकिन एक मिनेट बाँकी रहँदा हिमेशले गोल थपे ।

तेस्रो जितसँगै संकटाले ८ खेलमा १२ अंक जोडेको छ । छैटौं हार बेहोरेको सातदोबाटोको ८ खेलबाट ४ अंक छ ।

त्यसअघि दिनको पहिलो खेलमा अग्रता जोगाउन नसक्दा मच्छिन्द्रले विभागीय टोली पुलिससँग बराबरीमा रोकियो । खेल ३-३ को बराबरीमा सकिएको हो ।

मच्छिन्द्रका पदम तामाङ, प्रशान्त मोयाङ्बो र रोनिक रानामगरले गोल गरे। पुलिसका विक्रम गौतम, कप्तान सुवास बम र सुजलमान घलेले गोल गरे।

३० औं मिनेटमा पदमको गोलसँगै मच्छिन्द्रले अग्रता लिएको थियो । ५४ औं मिनेटमा प्रशान्तले मच्छिन्द्रको अग्रता दोब्बर बनाए ।

७५ औं मिनेटमा पुलिसका विक्रमले गोल गर्दै खेल २-१ मा ल्याए । ७७ औं मिनेटमा रोनिकले गोल गर्दै मच्छिन्द्रलाई ३-१ ले अगाडि बढाए।

७९ औं मिनेटमा अनिश थिङले दोहोरो पहेंलो कार्ड बेहोर्दै मैदान छाडेपछि मच्छिन्द्र १० खेलाडीमा समेटियो। ८५ औं मिनेटमा पुलिसका कप्तान सुवासले गोल गर्दै खेल ३-२ को स्थितिमा ल्याए। इन्ज्युरी समयमा सुजलले गोल गर्दै पुलिसलाई हारबाट जोगाए।

योसँगै शीर्ष स्थानमा रहेको पुलिसले ८ खेलबाट २० अंक पुगेको छ। समान खेलमा मच्छिन्द्र १५ अंक जोडेर चौथो स्थानमा छ।