काठमाडौं (हाम्रो खेलकुद)- बालबालिकालाई ‘माई फुटबल किट’ कार्यक्रमको माध्यमबाट जीवन जिउने कला सिकाउन एनपिओ रियाले वर्ल्ड (सत्य संसार) ले पहल सुरु गरेको छ।

रियाले वर्ल्डले शनिबार एन्फा कम्प्लेक्समा ६ देखि १० वर्षसम्मका ६० जना बालबालिकालाई सातदोबाटो स्थित एन्फा कम्प्लेक्समा प्रशिक्षण दिएको थियो।

रियाले वर्ल्डका कार्यक्रम संयोजक फुटबल प्रशिक्षक बालगोपाल साहुखलले जीवन जिउने उपयोगी कला सिकाउने उद्देश्यले बालबालिकाका लागि माई फुटबल किट कार्यक्रम संचालन गरेको बताए‌।

‘ टुक्राहरु जोडेर बल बनाउने, त्यही बल खेल्ने, बिग्रेपछि पुन: त्यसलाई जोडेर बल बनाउने अभ्यास गराउन सिकाउँछौ’ उनले भने, त्यसमा आइपर्ने समस्या समाधान गर्ने र सिर्जनशीलता देखाउँदै जीवन जिउने उपयोगी कला सिकाउने उद्देश्यका साथ यो‌ कार्यक्रम गरेका हौं‌।’ साहुखलले उपत्यकाका फुटबल एकेडेमी, स्कुल र मोफसलमा विस्तार गर्ने योजना रहेको बताए ।

राष्ट्रिय फुटबल टोलीका कप्तान किरण चेम्जोङसहित फुटबल प्रशिक्षक, रियाले वर्ल्डका नेपाली तथा जापानी १० जना स्वयंसेवकले कार्यक्रम सञ्चालन गरेका थिए ।

जापानी संस्था रियाले वर्ल्डले एकदशक भन्दा लामो समयदेखि नेपालमा फुटबल सामाग्री उपलब्ध गराउने लगायत अन्य सहयोग गर्दै आएको साहुखलले छ।

भक्तपुरको बोडेमा रियाले वर्ल्डले सन्चालन गरेको फुटबल एकेडेमीमा ८० जना बालबालिकाले नियमित प्रशिक्षण गरिरहेका छन्। रियाले वर्ल्ड नेपालमा सत्य संसारको नाममा सन्चालन गरिएको छ।

रियालले वर्ल्डले शुक्रवार भक्तपुर नयाँ थिमीस्थित शंखधर मेमोरियल स्कुलमा ८ देखि १२ वर्षका बालबालिकालाई सोही प्रशिक्षण दिएको थियो।