काठमाडौं (हाम्रो खेलकुद) – मलेसियामा रहेको नेपाल एपिएफ फुटबल क्लबको महिलाले टोली एएफसी वुमेन्स च्याम्पियन्स लिगको प्रारम्भिक चरणमा आज उज्वेकस्तानको नसाफ क्लबसँग प्रतिस्पर्धा गर्दै छ ।

लिक्सा स्टेडियममा हुने खेल नेपाली समय अनुसार आइतबार साँझ ५ः४५ बजे सुरु हुनेछ। एपिएफ नेपालबाट अन्तर्राष्ट्रिय महिला क्लब फुटबल खेल्ने पहिलो टोली हो ।

एसियन फुटबल कन्फेडेरेसन(एएफसी) ले एसियामा महिला फुटबलको विकासका लागि पहिलो पटक वुमेन्स च्याम्पियन्स लिग गराउँदैछ । एपिएफ नेपालको महिला लिग च्याम्पियनको हैसियतमा प्रतियोगिताका लागि छनोट भएको हो ।

च्याम्पियनसिपको प्रारम्भिक चरण खेल्न लागेको एपिएफले राम्रो तयारी गरेको राष्ट्रिय टोलीकी सदस्य समेत रहेकी टोलीकी कप्तान अनिता बस्नेत बताएकी छिन् ।

‘अहिले राम्रो भइरहेको छ । साम्बा नहुँदा पनि बहिनीहरुले राम्रो मेहनत गरिरहेका छन्,’ मलेसिया जानु अघि कप्तान अनिताले हाम्रो खेलकुदसँग भनेकी थिइन् ‘साम्बा नहुँदा पनि टिमको आशा छ । राम्रो गर्नेमा सबै जना विश्वस्त छन् ।’

एपिएफबाट खेल्दै आएकी फरवार्ड साबित्रा भण्डारी(साम्बा) हाल व्यवसायिक फुटबल खेलका लागि फ्रान्समा रहेकी छिन् ।

लिगमा २२ सदस्य राष्ट्रका क्लबहरुको सहभागिता रहनेछ । जसमा सन् २०२४ को फिफा वरियतामा टप आठमा परेका राष्ट्रका क्लबहरु समूह चरणका लागि सिधै छनोट भईसकेका छन् ।

लिगमा एसियामा फुटबलका पावर हाउस मानिएका जापान, चीन, इन्डोनेसिया, फिलिपिन्स, अस्ट्रेलिया लगायत देशका क्लबको सहभागिता रहनेछ । बाँकी १४ राष्ट्रले समूह चरणका लागि प्रारम्भिक चरण पार गर्नुपर्ने हुन्छ ।

प्रारम्भिक चरणमा रहेका १४ देशका क्लबहरुलाई ४ समूहमा विभाजन गरिएको छ । प्रत्येक समूहको विजेता च्याम्पियन्सिपको समूह चरणका लागि छनोट हुनेछन् ।
एपिएफले बुधवार अन्तिम खेलमा मलेसियाको सबाह एफसीसँग खेल्नेछ ।