काठमाडौं (हाम्रो खेलकुद)- प्रधानमन्त्री केपी शर्मा ओलीले नेपालको एकमात्र अन्तराष्ट्रिय स्तरको दशरथ रंगशालाले‌ देशको बेइज्जत भैरहेको बताएका छन्।

काभा महिला नेसन्स लिगमा रजत पदक जितेको नेपाली टोलीको पुरस्कृत गर्न आयोजित कार्यक्रममा बिहीवार प्रधानमन्त्री ओलीले विक्रम सम्वत २०४४ सालमा जेलबाट रिहा भएदेखि दशरथ रंगशाला यतिसम्म बिग्रेको आफूले पहिलो पटक देखेको बताए।

यो मैदानले अन्तराष्ट्रिय स्तरमा नेपालको बेइज्जत भैरहेकोले यसमा सबैको ध्यान जानु पर्नेमा उनको जोड थियो।

साउन २९ गते एएफसी च्यालेन्ज लिगको प्रारम्भिक चरणमा भुटानको पारो एफसीले नेपालका चर्च ब्वाइजबीच खेल्दा त्रिपुरेश्वरस्थित दशरथ रंगशालाको मैदान हिल्लामे र खेत जस्तै बनेको थियो।

यही कारण बुधवार साफ यु-२० च्याम्पियनसिपमा नेपाल र बंगलादेशबीचको‌ फाइनल खेल दशरथ रंशालामा हुन सकेन। सबै खेल सातदोबाटो स्थित एन्फा मैदानमा भएको थियो।

एसियन फुटबल कन्फेडेरेसन(एएफसी ) ले गत वैशाखमा फिफा विश्वकप २०२६ तथा एसियन कप २०२७ को संयुक्त छनोट अन्तर्गत युएईसँगको खेलको लागि दशरथ रंगशालालाई अयोग्य ठहर गरेको थियो।

त्यसयता दशरथ रंगशालाको मर्मत र व्यवस्थापनको सबै जिम्मेवारी अखिल नेपाल फुटबल संघबाट राष्ट्रिय खेलकुद परिषदले आफैमा फिर्ता लिएको थियो।