काठमाडौं (हाम्रो खेलकुद)-  अखिल नेपाल फुटबल खेलाडी संघले  बि डिभिजन लिगको यथाशीघ्र मिति  तोकेर संचालन गर्न अखिल नेपाल फुटबल संघ (एन्फा) को ध्यानाकर्षण गराएको छ।

खेलाडी संघका‌ अध्यक्ष विक्रम लामाको नेतृत्वमा गएको टोलीले आइतवार एन्फा अध्यक्ष पंकज विक्रम नेम्वाङलाई ध्यानाकर्षण पत्र बुझाएको थियो।

गत वर्षकै क्यालेन्डरमा समावेश भएको बी डिभिजन लिग आयोजना हुन नसक्दा भने यसले फुटबल खेलाडीलाई मात्र नभइ समग्र नेपालको फुटबललाई नै असर गरेको छ। नयाँ सिजन सुरु हुनुपर्ने समयमा पनि गत सिजनको लिग नसक्दा त्यसले प्रत्यक्ष प्रभाव पारेको छ। तसर्थ खेलाडी संघ घरेलु फुटबल संरचना अन्तर्गतको  बि डिभिजन लिग क्लबहरुसँग समन्वय गरी यथाशीघ्र मितिमा तोकेर संचालनमा ल्याउन संघको ध्यानाकर्षण गर्दछौं,’ पत्रमा भनिएको छ।

खेलाडी संघले ए डिभिजन लिग सकिएको झन्डै एक वर्ष बित्न लाग्दा पनि एन्फाले तोकेकै मितिमा नयाँ संस्करण हुने नहुने पक्का गर्न सकेको पनि स्मरण गराएको छ।

नेपाली फुटबलमा नयाँ क्रान्तिको विन्दु बनेको नेपाल सुपर लिग (एनएसएल) को अनिश्चितताले खेलाडीहरुलाई अझ त्रसित बनाएको छ भन्दै खेलाडी संघले  एन्फालाई लिगको मिति यकिन गर्नुका साथै एनएसएलको सुनिश्चितताका लागि पहल गर्न पनि आग्रह गरेको‌ छ।