काठमाडौं(हाम्रो खेलकुद) – कोशी प्रदेशले एन्फा महिला लिगमा लगातार तेस्रो जित हात पारेको छ । लगातार तेस्रो जित हात पार्ने क्रममा कोशीले आइतवार कर्णाली प्रदेशलाई ४-० ले पराजित गर्यो ।

एन्फा कम्प्लेक्स सातदोबाटोमा भएको खेलमा कोशीलाई जित दिलाउन पुर्णिमा राईले २ तथा प्रतिक्षा राई र समिक्षा मगरले समान १ गोल गरे ।

पुर्णिमाले ३४औं मिनेटमा गरेको गोलबाट कोशीले अग्रता लियो । ६६औं मिनेटमा समिक्षाले अग्रता दोब्बर बनाइन् ।

पुर्णिमाले ७१औं मिनेटमा व्यक्तिगत दोस्रो तथा कोशीका लागि तेस्रो गोल गरिन् । प्रतिक्षाले ७४औं मिनेटमा गोल गर्दै कोशीको अपराजित यात्रा कायमै राखिन् ।

तेस्रो खेलमा अपराजित रहँदै ९ अंक जोडेको कोशी तालिकाको शीर्ष स्थानमा छ । पराजित कर्णाली नवौं स्थानमा झरेको छ ।

आज नै हुने दोस्रो खेलमा नेपाल पुलिस क्लब र बागमती युथ क्लबबीच खेल हुनेछ । एन्फा कम्प्लेक्समा हुने खेल दिउँसो ४ः१५ बजे सुरु हुनेछ । पुलिस १ जित र १ बराबरीका साथ दोस्रो स्थानमा रहेको छ ।

बागमतीलाई हराउँदै पुलिस आफ्नो अपराजित यात्रा कायमै राख्न चाहन्छ । बागमती भने १ जित र १ हारका साथ चौथो स्थानमा छ ।

अखिल नेपाल फुटबल संघ (एन्फा) को आयोजना सुरु भएको लिगमा १० टोलीको सहभागिता रहेको छ। पहिलो चरणमा सबै टोलीले एकअर्काको सामना गर्नेछ ।