काठमाडौं (हाम्रो खेलकुद)- एन्फा महिला लिगमा विभागीय टोली नेपाल पुलिस क्लबले पहिलो गोल बेहोरेको छ ।

पुलिसले अर्को विभागीय टोली त्रिभुवन आर्मी फुटबल क्लबसॅंग शनिवार १-१ को बराबरी खेलेको छ । दशरथ रंगाशालामा भएको खेलमा पुलिसका लागि अमृता जैशी र आर्मीका लागि अमिशा कार्कीले गोल गरिन् ।

अमृताले ४८औं मिनेटमा गोल गर्दै पुलिसलाई अग्रता दिलाएकी थिइन् । ६३ औं मिनेटमा आर्मीकी अमिशाले बराबरी गोल फर्काइन् ।

पुलिस, आर्मी र अर्को विभागिय टोली एपिएफ फुटबल क्लब ३ टोलीबीचको प्रतिस्पर्धामा एपिएफ बढि अंक जोड्न सफल भएको छ।

पुलिस सँग गोलरहित बराबरी खेलेको एपिएफले आर्मीलाई हराएको थियो। ३ टोलीले एकअर्काको सामना गर्दा समान २ खेलमा एपिएफले ४, पुलिसले २ र आर्मीले १ अंक जोड्यो।

बराबरी पछि पनि पुलिसले लिगमा अग्रता कायमै राखेको छ । पुलिसको ५ खेलबाट ११ अंक भएको छ । बराबरी पछि आर्मीले ५ खेलमा १० अंक बनाएको छ ।

आजै हुने दोस्रो खेलमा संकटा क्लब र कोशी प्रदेश आमने सामने हुँदैछन् । लिगमा ४ खेलमा ९ अंक जोड्दै कोशी चौथो स्थानमा छ । संकटा भने समान ४ खेलमा ४ अंकका साथ सातौं स्थानमा छ ।

अखिल नेपाल फुटबल संघ (एन्फा) को आयोजना सुरु भएको लिगमा १० टोलीको सहभागिता रहेको छ। पहिलो चरणमा सबै टोलीले एकअर्काको सामना गर्नेछ ।