काठमाडौं (हाम्रो खेलकुद)- नेपालले साफ यु-१७ च्याम्पियनसिप फुटबलको सेमिफाइनलमा पराजित भएको छ। भारतसँग ४-२ को हार बेहोर्दै नेपाल प्रतियोगिताबाट बाहिरिएको हो। भारतफाइनल पुगेको छ।‌

थिम्पुस्थित चङ्लिमिथाङ रंगशालामा भएको सेमिफाइनल खेलको पहिलो हाफ गोलरहित बराबरीमा सकियो।

दोस्रो हाफमा भारतले पकड बनायो। विशाल यादवले आठ मिनेटभित्र दुई गर्दै भारतलाई सहज स्थितिमा पुर्याए। ६१औं मिनेटमा गोलको खाता खोलेका विशालले ६८ औं मिनेटमा व्यक्तिगत दोस्रो गोल गरे।

८१औं मिनेटमा नेपालको एागि सुबाश बमले एक गोल फर्काए। खेल २-१ मा पुग्यो। तर लगतै ८५औं मिनेटमा एन ऋषी सिंहले भारतको लागि तेस्रो गोल गरे।

खेल सकिन एक मिनेट बाकी छँदा भारतका मोहम्मद केफले आत्मघाती गोल नेपाललाई उपहार दिए। खेल यतिमा मात्र सकिएन र इन्जुरी समयको पाँचौं मिनेटमा हेमनेचुङ लुनकिमले गोल गरे। योसँगै भारतले नेपाललाई ४-२ को हार चखाउँदै फाइनलको यात्रा तय गर्यो।

समूह चरणमा २ जित र १ हार सहित नेपाल समुह उपविजेता बन्दै सेमिफाइनलमा पुगेको थियो। नेपाल पहिलो खेलमा पाकिस्तानसँग १-० ले हारेको थियो।

यसपछि श्रीलंकालाई ४-० र भुटानलाई २-१ ले हराउँदै नेपाल सेमिफाइनलमा पुगेको हो। गत संस्करण नेपाल फाइनलमा पुगेको थियो। यो पटक भने सेमिफाइनलमा नै पराजित भएको छ।