काठमाडौं (हाम्रो खेलकुद)- वर्षाका कारण आएको पहिरो परि मृत्यु भएका एन्फा एकेडेमी सिस्नेरीका ६ युवा खेलाडीको अन्तिम संस्कारका लागि प्रक्रिया अघि बढाइएको अखिल नेपाल फुटबल संघ (एन्फा) ले जनाएको छ।

असोज ११ र १२ गतेको वर्षाका कारण मकवानपुर जिल्लाको इन्द्रसरोवर गाउँपालिका वडा नं ३ स्थित श्री वात्सल्य देवी उच्च माविको प्रशिक्षण केन्द्रबाट सुरक्षित स्थानतर्फ जाँदै गर्दा पहिरोमा परी दिवस बानियाँ, प्रियंस आचार्य, अनुपम घलान, साइमन योन्जन, विकल रेग्मी र आदित्य बलम्पाखीको मृत्यु भएको थियो।

एन्फालेले मृतक खेलाडीहरूको पार्थिव शरीरलाई स-सम्मान अन्त्येष्टि गर्ने व्यवस्था मिलाएको जनाएको छ। अनुपम घलान, साइमन योन्जन र विकल रेग्मीको पार्थिव शरीरलाई हेलिकप्टरमार्फत गृह जिल्ला मकवानपुर पठाइएको बताइएको छ।

आदित्य बलम्पाखीको पार्थिव शरीरलाई हेलिकप्टर मार्फत लालबन्दी १७ रानिगञ्ज सर्लाही पठाउने तयारी गरिएको छ तथा दिवंगत दिवस बानिया र प्रियंस आचार्यको अन्त्येष्टि सोमवार पशुपति आर्यघाटमा गरिने एन्फाले प्रेस विज्ञप्ति मार्फत जानकारी दिएको छ।

एन्फाले सम्बन्धित जिल्ला संघका पदाधिकारी तथा खेलप्रेमी महानुभावहरूलाई दिवंगत खेलाडीको स-सम्मान अन्त्येष्टिमा सरिक हुन अनुरोध गरेको छ।
एन्फा एकेडेमी सिस्नेरीमा रहेका स्थानिय बाहेक अन्य ३० खेलाडीलाई शनिवार हेलिकप्टरमार्फत काठमाडौं ल्याइएको थियो।