लन्डन (एजेन्सी– एलेक्सिस सान्चेजको विवादास्पद हाते गोल र अन्तिम समयको पेनाल्टी गोलको मद्दतमा प्रिमियर लिगमा शनिबार आर्सनल विजयी भएको छ ।
प्रशिक्षक आर्सन वेङ्गरको प्रतिबन्धित चारमध्येको अन्तिम खेलमा आर्सनलले हल सिटीलाई २–० ले हराएको छ । जितसँगै आर्सनल अंकतालिकाको तेस्रो स्थानमा उक्लेको छ ।
पहिलो हाफमा विवादास्पद गोलबाट आर्सनलले खेलको ३४ औं मिनेटमा अग्रता लियो । हलका किपर एल्डिन जाकुपोबिकले गोललाइनबाट गरेको सेभ सान्चेजको हातमा लाग्दै गोल भएपछि रेफ्री मार्क क्लाटेनबर्गले लाइनका रेफ्रीसँग सल्लाह लिदै गोल दिएका थिए । हल सिटीका रक्षकहरुले अपिल गरेपनि रेफ्रीले सान्चेजको हाते गोल अन्जानमा भएको कारण आफ्नो निर्णय बदलेनन् ।
पहिलो हाफमा पछि परेको हलले दोस्रो हाफमा गोल गर्ने प्रयास जारी राख्यो । धेरै जसो काउन्टरमा सक्रिय देखिएको हल सिटी गोल गर्नबाट भने चुक्यो । इन्जुरी समयमा लुकास पेरेजको हेड मार्फतको प्रहारलाई हातले बचाउदा हलका स्याम क्लुकासले रातो कार्डको सामना गर्दै मैदान छाड्न परेको थियो । पेनाल्टीलाई गोलमा परिणत गर्दै सान्चेजले आर्सनलको जित निश्चित गरे ।
