काठमाडौं(हाम्रो खेलकुद) – विभागीय टोली नेपाल पुलिस क्लबले एन्फा महिला लिगको पहिलो चरणको अन्तिम खेलमा जित निकालेको छ ।

तेस्रो स्थानमा रहँदै सुपर लिगका लागि छनोट भएको पुलिसले संकटा क्लबमाथि २-१ को जित निकाल्यो ।

एन्फा कम्प्लेक्स सातदोबाटोमा शुक्रवार भएको खेलमा पुलिसको जितमा अनुष्का शेर्पा र समिक्षा घिमीरेले समान १ गोल गरे । संकटाका लागि विदेशी खेलाडी सेलिना अनिमाले १ गोल फर्काइन् ।

तेस्रो मिनेटमा नै अनुष्काले गोल गर्दै पुलिसलाई अग्रता दिलाइन् । पहिलो गोल भएको पाँच मिनेट पछि नै पेनाल्टी मार्फत गोल गर्दै समिक्षाले पुलिसको अग्रता दोब्बर बनाइन् ।

खेलको ७३औं मिनेटमा अनिमाले गोल गर्दै संकटालाई खेलमा फर्काउने कोशिश गरे पनि थप गोल हुन नसक्दा पुलिसले खेलमा जित हात पार्यो । साफ महिला च्याम्पियनसिपको बन्द प्रशिक्षणमा रहेका कारण पुलिसका केही महत्वपुर्ण खेलाडी आजको खेलमा थिएनन् ।

पहिले नै दोस्रो चरणमा पुगिसकेको पुलिस पहिलो चरणमा अपराजित रह्यो । पुलिसले खेलेको ९ खेलमा ६ मा जित र ३ बराबरी खेलेको थियो ।

पुलिस सहित नेपाल एपिएफ, त्रिभुवन आर्मी, वालिङ नगरपालिका र कोशी प्रदेशले लिगको दोस्रो चरणमा स्थान बनाएका छन् । दोस्रो चरणमा सहभागी पाँच टोलीबीच डबल राउन्ड रोविन लिगमा समूह चरणका खेल हुनेछन् । दोस्रो चरणको खेल तालिका भने सार्वजनिक भएको छैन।