काठमाडौं, असोज ११ गते ।
नेपाली टोली रक्षक रोहित चन्दलाई पाँच बर्ष पछि घरेलु फुटबलमा खेल्ने भएका छन् । उनले लक्ष्मी हुन्डाई मनाङ मस्याड्दीबाट लिग खेल्न लागेका हुन् ।
नागरिक दैनिकका अनुसार रोहित र मनाङबीच सोमबार सम्झौता पत्रमा हस्ताक्षर हुँदैछ । रेडबुल राष्ट्यि लिगमा १९ अंकसहित मनाडले अब ६ खेल खेल्न बाँकी छ । शीर्षस्थानमा रहेको रमपम झापाको २४ र रुस्लान थ्री स्टारको २२ अंक छ । २०६६ ६७ मा मच्छिन्द्र क्लबबाट डेब्यू गरेका रोहित व्यवसायिक फुटबलका लागि अर्को सिजन भारत पुगेका थिए ।
डेब्यू लिगमै उत्कृष्ट रक्षक चुनिएका रोहितले क्लबका २२ मध्ये २१ खेल खेलेका थिए । एन्फा एकेडेमीको उत्पादन उनको यात्रा भारत पनि रोकिएन । दुई सिजन भारतमा खेलेपछि उनी इन्डोनेसिया लागेका थिए । गएको जुनमा फिफाले इन्डोनेसियामाथि प्रतिबन्ध लगाएपछि त्यहाँ फुटबल गतिविधि बन्द छ । त्यसपछि रोहित स्वदेश फर्केका थिए ।
