साविक विजेता बंगालादेशको सामना गर्दै पाकिस्तान

काठमाडौं ( हाम्रो खेलकुद)- काठमाडौंमा जारी महिला साफ च्याम्पियनसिपको समूह एमा आज साविक विजेता बंगालादेश र पाकिस्तानबीच खेल हुँदैछ।

त्रिपुरेश्वरस्थित दशरथ रंगशालामा खेल साँझ ५ः३० बजे सुरु हुनेछ। पहिलो खेल भारतसँग ५-२ ले गुमाएको पाकिस्तानको समूह चरणमा यो अन्तिम खेल हो ।

आजको खेलमा पनि पराजित भएको अवस्थामा पाकिस्तान प्रतियोगिताबाट बाहिरिने पहिलो टोली बन्नेछ। त्यसैले पाकिस्तानले अन्तिम मौकालाई खेर जान नदिन हरसम्भव प्रयास गर्नेछ।

पाकिस्तानले आजको खेलमा जिते वा बराबरी गरेको अवस्थामा सेमिफाइनल समिकरणका लागि समूहको अन्तिम खेलको नतिजा पर्खनुपर्ने हुन्छ।

अर्कोतर्फ उपाधि रक्षाको लक्ष्यसहित नेपाल आएको बंगालादेश जितेका साथ यात्रको सुरु गर्ने प्रयासमा हुनेछ। बंगालादेशले आजको खेल जितेमा बंगलादेश र भारत एक खेल अघि नै सेमिफाइनलमा पुग्नेछन्।

बंगालादेश, पाँच पटक विजेता भारत र पाँच पटकको उपविजेता नेपाललाई यसपटक पनि दाबेदारका रुपमा हेरिएको छ। यद्यपी नेपालको सुरुवात भने सोचे जस्तो रहेन ।

समूह बीमा नेपाल र भुटानले गोलरहित बराबरी खेल्नुअघि सोही समूहमा श्रीलंकाले माल्दिभ्सलाई १-० ले हराएको थियो। राउन्ड रोबिन लिगपछि समूह शीर्ष दुई टोली सेमिफाइनल पुग्नेछन्।