काठमाडौं (हाम्रो खेलकुद)– महिला साफ च्याम्पियनसिपका सेमिफाइनल सम्भावना बढाउनका लागि माल्दिभ्सविरुद्ध खेल्न लागेको नेपाली टोलीमा ५ परिवर्तन गरिएको छ।

कप्तान तथा गोलकिपर एन्जिला तुम्बापो सुब्बालाई आराम‌ दिदैं पोस्ट सम्हाले जिम्मा अन्जना रानामगरलाई मौका दिइएको छ ।

टोलीका मुख्य प्रशिक्षक राजेन्द्र तामाङले सावित्रा भण्डारी साम्बालाई बेन्चमा राखेका छन्‌। रेनुका नगरकोटेले कप्तानीको‌ जिम्मेवारी निर्वाह गर्नेछिन् ।

एन्जिलासहित चोटग्रस्त हिरा भुजेल, अमिषा कार्की, अमृता जैसी, पुजा राना आज पहिलो रोजाईमा छैनन्। अन्जनासहित रेखा पौडेल‌, विमला विक, विमला चौधरी र निशा थोकरले जारी साफमा पहिलो पटक सुरुवाती ११ मा मौका पाएका छन्।

भुटान विरुद्ध सुरुवात गरेका रेनुका सहित, सुरु लिम्बु, प्रिती राई, रश्मीकुमारी घिसिङ, गिता राना र सविता राना मगरले पहिलो रोजाईमा निरन्तरता पाएका छन्।

भुटानसँगको पहिलो खेलमा गोलरहित बराबरीमा रोकिएका केहि दबाब र आलोचना खेपेको नेपाली टोली आज जितेर सेमिफाइनलको आधार तयार पार्नेमा जुट्नेछ ।

तुलानात्मक रुपमा माल्दिभ्स कमजोर टोली मानिन्छ। माल्दिभ्स पहिलो खेलमा श्रीलंकासँग १–० ले पराजित भएको थियो ।

सावित्रा भण्डारी सम्बा फ्रान्सबाट आज बिहानमात्र स्वदेश आइपुगेकी थिइन् । उनको आगमनबाट टोली उत्साहमा रहेको छ । उनी खेल्न तयारी भएको अवस्थामा खेलाउने टोलीका मुख्य प्रशिक्षक राजेन्द्र तामाङले बताएका थिए ।

नेपाल र माल्सिभ्सले साँझ ५ः३० बजे खेल्नुअघि अर्को खेलको नतिजा आइसकेको छ । त्रिपुरेश्वस्थित दशरथ रंगशालामा भएको पहिलो खेलमा भुटानले श्रीलंकालाई ४-१ ले हराएको छ । समूह बीमा भुटानको ४ अंक, श्रीलंकाको ३, नेपाल १ तथा माल्दिभ्स अंक विहीन छ ।

समूह एमा आइतबार बंगलादेश र पाकिस्तानले १–१ को बराबरी गरेपछि अन्तिम खेलबाट मात्र सेमिफाइनल पुग्ने दोस्रो टोलीको टुंगो लाग्नेछ । पहिलो खेलमा पाकिस्तानलाई ५–२ ले हराएको भारत सेमिफाइनल पुगिसकेको छ । बुधबार भारत र बंगलादेशको खेलपछि समूहको विजेता उपविजेताको टुंगो लाग्नेछ ।