काठमाडौं (हाम्रो खेलकुद)– राष्ट्रिय टोलीका युवा स्ट्राइकर अन्जन विष्ट स्पेनको बार्सिलोनामा सम्मानित भएका छन् । स्पेनको मार्बेला युनाइटेड एफसीमा प्रशिक्षण लिइरहेका उनलाई नेपाली समुदायको जनप्रगतिशिल मञ्च, स्पेनले आइतबार सम्मान गरेको हो । फुटबलमार्फत देशलाई अन्र्राष्ट्रिय क्षेत्रमा चिनाउन योगदान गरेको भन्दै अन्जनलाई मञ्चले सम्मान गरेको थियो ।
‘ विश्वको जुन सुकै ठाँउमा पुग्दा पनि नेपालीबाट माया र सम्मान पाउँछौं’, अन्जनले हाम्रो खेलकुदसँग भने, ‘यस्तो आत्मियता पाउँदा खुसी लाग्छ र अझै देशका लागि राम्रो गर्दै जानुपर्छ भन्ने हौसला मिल्छ ।’ झन्डै १ घन्टा २० मिनेटको हवाई यात्रा गर्दै उनी बार्सिलोना सम्मान ग्रहण गर्न गएको अन्जनले जानकारी दिए । प्रशिक्षण र मिले सम्म ट्रायल दिनका लागि स्पेन पुगेका अन्जनले माघको पहिलो साताबाट अभ्यास थालेका थिए । उनी तीन महिनाका लागि त्यहाँ पुगेका हुन् । ‘प्रशिक्षण राम्रो भइरहेको छ’ उनले भने, ‘कहिले सम्म अभ्यास वा ट्रायल केही भनिएको छैन । म नियमित प्रशिक्षण गरिरहेको छु । ’
पुस १५ गते सातौं राष्ट्रिय खेलकुदको फुटबलमा एपिएफलाई स्वर्ण पदक दिलाउन महत्वपूर्ण भूमिका खेलेपछि उनी स्पेन लागेका थिए । स्पेन जानुअघि उनलाई एपिएफले उनीसहित ६ खेलाडीलाई मस्ट भ्यालुएवल प्लेयरबाट सम्मानित गरेको थियो । ६ मध्ये अन्जनका दाई एपिएफकै स्ट्राइकर रञ्जन पनि थिए । सातौं राष्ट्रिय खेलकुद फुटबलको फाइनलमा अन्जनकै २ गोलमा आर्मीलाई २–० ले हराउँदै एपिएफ च्याम्पियन बनेको थियो । स्पेनको मार्बेला त्यहि क्लब हो जसमा अन्जन र राष्ट्रिय टोलीका रक्षक अनन्त तामाङले गत बर्ष केही साता अभ्यास गर्नुका साथै केही मैत्रीपूर्ण खेल खेलेका थिए ।
मार्बेला युनाइटेड युएस सकर एकेडेमीको शाखाको रुपमा स्पेनको मालागामा स्थापित क्लब हो । सुरुमा युएस सकरकै नाममा स्थापना गरिए पनि २०१४ मा मार्बेला युनाइटेड एफसी नाम राखिएको क्लबको बेभसाइटमा उल्लेख छ । नेपालले पछिल्लो डेढ बर्षमा साफ यू १९, बंगबन्धु गोल्डकप, १२ औं दक्षिण एसियाली खेलकुदमा यू २३ मा स्वर्ण र कात्तिक अन्तिममा एएफसी सोलिडारिटी कपगरि फुटबलमा चारवटा उपाधि जितेको थियो । ती सबै टोलीमा अन्जन थिए । सोलिडारिटी कप च्याम्पियन नेपाली टोलीलाई सरकारले सोमबार काठमाडौंमा जनही ३ लाख रुपैयाँबाट सम्मानित गर्दैछ ।
