काठमाडौं, असोज ११
अखिल नेपाल फटबल संघ (एन्फा) ले निर्वाचित तीन उपाध्यक्ष कर्माछिरिड शेर्पा, विजयनारायण मानन्धर र किशोर राई तथा सदस्य पंकज नेम्बाडलाई अर्को साधारण सभा सम्मका लागि बर्खास्त गरेको छ ।
एन्फाको संस्थापनसँग असहमत राख्दै आएका तीन उपाध्यक्ष र सदस्यलाई लगातार तीन बैठक उपस्थित नभएको र स्पष्टिकरण चित्त बुझ्दो नभएको भन्दै बर्खास्त गरेको छ । एन्फा कार्यसमितिको सोमबार बसेको बैठकले बर्खास्तको निर्णय गरेको हो ।
फाइल तस्विर-राखेप सदस्य सचिव केशबकुमार विष्टलाई स्वागत गर्दै एन्फाबाट सोमबार बर्खास्तमा परेका तीन उपाध्यक्ष कर्मा छिरिड शेर्पा, किशोर राई र विजयनारायण मानन्धरसहित अन्य ।
बैठकका एजेन्डा पहिले पाउने पर्ने मागबाट सुरु भएको एन्फाको विवाद अहिलेका लागि बर्खास्तसम्म आइपुगेको छ । एन्फासँग असहमत राख्दै आएको पक्षले एन्फा र अध्यक्ष गणेश थापाविरुद्ध सार्वजनिक लेखा समिति, अख्तियार दुरुपयोग अनुसन्धान आयोग र सम्पत्ति सुद्दिकरणमा समेत उजुरी दर्ता गराएको थियो । लेखा समितिले एन्फमा ५८ लाख रुपैयाँभन्दा बढी भ्रष्टाचार भएको ठहर गर्दै थप अनुसन्धानको जिम्मा अख्तियारलाई लगाएको थियो। अख्तियारले प्रमाण नपुगेको भन्दै गत बर्ष नै एन्फाविरुद्धको उजुरी तामेलीमा राखेको थियो । शर्पा, मानन्धर र नेम्बाडले पाटन पुनरावेदन अदालतमा उजुरी दिएपछि अदालतको आदेश अनुसार भदौ १६ गतेका लागि तय एन्फा साधारण सभा स्थगित भएको थियो । त्यसलगत्तै बसेको एन्फा बैठकले निर्वाचित पदाधिकधारी र सदस्यलाई कारवाही गरेको हो । एन्फाको पछिल्लो निर्वाचन २०७० कात्तिकमा भएको थियो । जसमा अध्यक्ष थापासहित १७ कार्यसमिति निर्विरोध निर्वाचित भएको थियो ।
