रोयल गोर्खालाई सहदेव स्मृति फुटबल उपाधि

काठमाडौं (हाम्रो खेलकुद) – रोयल गोर्खा एफसीले पाँचौं सहदेव स्मृति कप फुटबल प्रतियोगिताको उपाधि जितेको छ ।

युएई नेप्लिज फुटबल एसोसिएसन (युएनएफए) को आयोजनामा नेपाली समुदायबीच भएको प्रतियोगिताको फाइनलमा गोर्खा के नाइन एफसीलाई १–० ले हराउँदै रोयल गोर्खाले उपाधि जितेको हो ।

नविन विकेको निर्णायक गोलमा रोयल गोर्खा विजयी भएको थियो । अनिष श्रेष्ठ प्रतियोगिताको सर्वोत्कृष्ट खेलाडी, प्रज्वल राई उत्कृष्ट गोलकिपर, कुमार राई उत्कृष्ट प्रशिक्षक र विकास गुरुङ सर्वाधिक गोलकर्ता बनेका थिए ।

विजेता टोलीले ३ हजार ३ सय ३३ र दोस्रो टोलीले २ हजार २ सय २२ दिराम प्राप्त गरे । शनिबार र आइतबार भएको दुई दिने प्रतियोगितामा १४ टोलीको सहभागिता थियो ।

अनिल शेर्पाको अध्यक्षता रहेको युएनएफएले आयोजना गरेको प्रतियोगिताको समापनमा युएईस्थित नेपाली दुतावास, एनआरएनए, नेपाली समाजलगायतका प्रतिनिधिको सहभागिता रहेको आयोजक एसोसिएसनका उपाध्यक्ष दीपेन्द्र भण्डारीले जानकारी दिए ।