धरान (हाम्रो खेलकुद)— बुढासुब्बा रेडबुल गोल्डकप फुटबल प्रतियोगितामा आज विभागिय टोली नेपाल पुलिस क्लब र आयोजक धरान फुटबल क्लबको पहेलो टोलीबीच प्रतिस्पर्धा हुँदैछ । धरान १७ स्थित एन्फा टेक्निकल सेन्टरमा सञ्चालित प्रतियोगितामा पहिलो दिन बिहीबार सिएमजी क्लब संकटा र भारतको दुर्गापुर स्टिल कोलकातालाई ३–२ ले हराएको थियो ।

फाइल फोटो

दुर्गापुर, भारतको अर्काे क्लब युनाइटेड सिक्कम फुटबल क्लबसहित १० टोलीले प्रतियोगितामा भाग लिएका छन् । आयोजक क्लबको पहेलो र निलो गरिका साथै एपिएफ क्लब, काँकडभिट्टा ट्रेनिङ सेन्टर झापा, रुपन्देही फुटबल क्लब, पोखरा फुटबल क्बल र नेपाल पुलिस क्लबले प्रतियोगिताभा प्रतिस्पर्धा गर्दैछन् ।

साविक विजेता मनाङ मस्र्याङ्दी क्लब बंगलादेशमा हुने शेख कमल अन्र्ताराष्ट्रिय क्लब च्याम्पियनसिपमा भाग लिन गएका कारण यसपटक सहभागि छैन । प्रतियोगिताको विजेताले उपाधि सहित ५ लाख र दोस्रो हुने टोलीले २ लाख ५० हजार रुपैयाँ पाउनेछन् ।

झन्डै ५५ लाख रुपैयाँ खर्च हुने अनुमान गरिएको प्रतियोगिताको सर्वोत्कृष्ट खेलाडीले यामाहा मोटरसाइकल र उच्च गोलकर्ताले २५ हजार रुपैयाँ पाउने क्लबले जनाएको छ । उत्कृष्ट गोलकिपर, उत्कृष्ट डिफेन्स, उत्कृष्ट स्ट्राइकर, उत्कृष्ट मिडफिल्डर र उत्कृष्ट प्रशिक्षक तथा हरेक खेलको म्यान अफ दी म्याचले ५ हजार रुपैयाँ पाउनेछन् ।