काठमाडौं (हाम्रो खेलकुद) – शेख कमल अन्तर्राष्ट्रिय क्लब कपमा भाग लिन यहाँ बंगलादेश पुगेको लक्ष्मी हुण्डाई मनाङ मस्र्याङ्दी क्लबले बिहीबार प्रशिक्षण सुरु गरेको छ । टोली बुधबार साझ चितगोङ पुगेको थियो ।
मनाङका मुख्य प्रशिक्षक छिरिङ लोप्साङ गुरुङले हवाई यात्राको थकाईका कारण बिहिबार सामान्य प्रशिक्षण मात्रै गरिएको बताए । ‘खेलाडी मात्र हैन हामी पनि थकित छौं । त्यसैले पहिलो दिन सामान्य प्रशिक्षण ग¥यौ, ’ प्रशिक्षक लोप्साङले भने, ‘हामीसँग अझै दुई दिनको समय बाँकी छ । त्यसबीचमा हामी हाम्रो कमजोरीलाई सुधार्नेछौं ।’
प्रतियोगिता शनिबारबाट चितगोङस्थित एमए अजिज स्टेडियममा सुरु हुदैछ । समूह ‘बी’ मा रहेको मनाङले आइतबार बंगलादेशको मोहमोदेन स्पोर्टिङ क्लब लिमिटेडसँग खेल्नेछ । दोस्रो खेलमा अफगानिस्तानको शाहिम आस्मायीसँग बुधबार प्रतिस्पर्धा गर्ने मनाङले समूह चरणको अन्तिम खेलमा शुक्रबार आयोजक चितगोङ अवहनी लिमिटेडको सामना गर्नेछ ।समूहको विजेता र उपविजेता सेमिफाइनलमा प्रवेश गर्नेछ ।
प्रतियोगिताको उद्घाटन खेल नेपाली राष्ट्रिय टिमका गोलरक्षक सम्मिलित माल्दिभ्सको टीसी स्पोर्टस् क्लबले आयोजक ढाका अवहनी लिमिटेडबीच हुनेछ । दोस्रो खेलमा एफसी आल्गा र पोइचेनबीच खेल हुनेछ । प्रतियोगितामा पाँच देशका आठ टिमको सहभागिता छ ।
सहभागी क्लबहरुमा आयोजक बंगलादेशका ढाका अवहनी लिमिटेड, मोहमोदेन स्पोर्टिङ क्लब र चितगोङ अवहनी लिमिटेड छन् । दक्षिण कोरियाको पोचेने सिटिजन फुटबल क्लब, माल्दिभ्सको टीसी स्पोर्टस् क्लब, किर्गिस्तानको आल्गा एफसी, अफगानिस्तानको शाहिम आस्मायी र नेपालको मनाङ–मस्र्याङ्दी क्लब रहेको छन् । प्रतियोगिता फागुन १९ गते सम्पन्न हुनेछ ।
