चितगोङ –दोस्रो संस्करणको ‘शेख कमल अन्तर्राष्ट्रिय क्लब कप–२०१७’ को सम्पूर्ण तयारी पुरा भएको छ ।

आयोजक चितगोङ अवहनी लिमिटेडले शुक्रबार पत्रकार सम्मेलन गर्दै प्रतियोगिताको सम्पूर्ण तयारी पुरा भएको जानकारी गराएको हो । प्रतियोगिता अघिको पत्रकार सम्मेलनमा सबै टिमको प्रशिक्षक र कप्तानले उपाधि जित्ने लक्ष्यसहित बंगलादेश आइपुगेको बताएका छन् । मनाङका प्रशिक्षक छिरिङ लोप्साङ गुरुङले करिव डेढ महिनाको स्थानीय प्रतियोगिता र करिव एक साताको प्रशिक्षणले टिममा निखारता आएके बताए । प्रशिक्षक गुरुङले प्रतियोगिताको लागि पूर्ण रुपमा तयार रहेको र जसले मौका सिर्जना गर्दछ उसैको उपाधि जित्ने सम्भावना बढी रहेको बताए ।

यस्तै मनाङका कप्तान अनिल गुरुङले शेख कमल खेल्न पाउनु मनाङको लागि भाग्यको कुरा रहेको बताउदै स्थानीय स्तरमा तीन उपािध र सबै पाँचै प्रतियोगितामा फाइनलमा पुगेका कारण केही सहजता हुने बताए । यस्तै ढाका अवहनी लिमिटेडका विदेशी प्रशिक्षक ब्राभोले पहिलो खेल हेरेर दोस्रो खेलको लागि रणनीति बनाउने बताए ।

प्रतियोगिताको पहिले दिन समूह ‘ए’ का खेलहरु हुनेछन् । उद्घाटन खेल किर्गिस्तानको अल्गा एफसी र दक्षिण कोरियाको पोचेन सिटिजन फुटबल क्लबबीच खेल हुनेछ । यस्तै दोस्रो खेलमा बंगलादेशको लिग च्याम्पियन ढाका अवहनी लिमिटेडले नेपाली राष्ट्रिय टिमका गोलरक्षक सम्मिलित माल्दिभ्सको टीसी स्पोर्टस् क्लबसँग खेल्नेछ । पहिलो खेल दिउसो चार बजे र दोस्रो खेल साँझ सात बजे हुनेछ ।

मनाङ लक्ष्मी हुण्डाई मनाङ–मस्र्याङ्दी क्लबले आइतबार बंगलादेशको मोहमोदेन स्पोर्टिङ क्लब लिमिटेडसँग खेल्दै प्रतियोगिताको शुरुवात गर्नेछ । खेल नेपाली समय अनुसार दिउसो ३ः४५ बजेपछि शुरु हुनेछ । यसअघि मनाङको पहिलो र दोस्रो खेल साँझ सातबजेपछि हुने तय थियो । यस्तै मनाङले आफ्नो दोस्रो खेलमा अफगानिस्तानको शाहिम आस्मायीसँग बुधबार तथा समह चरणको अन्तिम खेलमा शुक्रबार आयोजक चितगोङ अवहनी लिमिटेडसँग प्रतिस्पर्धा गर्नेछ । समूहको विजेता र उपविजेता सेमिफाइनलमा प्रवेश गर्नेछ । प्रतियोगिताको लागि मनाङले शुक्रबार प्रशिक्षलाई निरन्तरता दिएको छ । नेपाली टोली बुधबार चितगोङ आइपुगेबो थियो । प्रतियोगिताका सबै खेलहरु चितगोङस्थित एमए अजिज स्टेडियममा हुनेछ ।

प्रतियोगितामा पाँच देशका आठ टिमको सहभागिता छ । सहभागी क्लबहरुमा आयोजक बंगलादेशका ढाका अवहनी लिमिटेड, मोहमोदेन स्पोर्टिङ क्लब र चितगोङ अवहनी लिमिटेड छन् । दक्षिण कोरियाको पोचेने सिटिजन फुटबल क्लब, माल्दिभ्सको टीसी स्पोर्टस् क्लब, किर्गिस्तानको आल्गा एफसी, अफगानिस्तानको शाहिम आस्मायी र नेपालको मनाङ–मस्र्याङ्दी क्लब रहेको छन् । फागुन ७ गतेबाट शुरु हुने प्रतियोगिता फागुन १९ गते सकिनेछ ।