दिपक बोहोरा,पाँचथर

ए डिभिजनको क्लब मच्छिन्द्र क्लबले न्यु स्टार क्लब सुनसरीलाई ६-२ ले हराउँदै ११ औं  फाल्गुनन्द गोल्ड कप फुटबल प्रतियोगिताको सेमिफाइनलमा प्रवेश गरेको छ ।

न्यु स्टार पहिलो खेलबाट घर फर्किएको छ । फिदिम माविको मैदानमा मंगलवार भएको खेलमा मच्छिन्द्र हाबी रह्यो ।

मच्छिन्द्रको जितमा  विजु भुजेलले २ गोल,आदित्य शाक्य, मनिष डागी र सौरभ सुब्बाले  समान १ गोल गरेका थिए । मच्छिन्द्रले एक गोल उपहार स्वरुप पाएको थियो । न्युस्टारका सञ्जय श्रेष्ठले बल क्लियर गर्ने क्रममा आत्माघाती गोल गरे ।  

विजुको गोलमा मच्छिन्द्रले पाँचौ मिनेटमै अग्रता लियो।
१३ औं मिनेटमा सुनसरीको न्यु स्टार सुशिल राईले गोल फर्काए ।  

१५ औं मिनेट विजुले अर्को गोल गर्दै  अग्रता बढाए । ४३ औं मिनेटम आदित्यले गोल गरेपछि मछिन्द्र पहिलो हाफमा  ३- १ ले अगाडि लाग्यो ।

५६ औं मिनेटमा मनिषले गोल गरे ।  ६७ औं मिनेटमा सञ्जयले आत्माघाती गोल भएको थियो ।  ६७ औं मिनेटमा न्यु स्टारका सन्दिप श्रेष्ठले गोल फर्काए पनि जितको लागी पर्याप्त भएन ।

८५ औं मिनेटमा मच्छिन्द्रका सौरभ सुब्बाले गोल थपे ।
तयारीका साथ पाँचथर आएकाले नतिजा पनि सोहीअनुसार आएको मच्छिन्द्रका प्रशिक्षक सन्तोष न्यौपानेले बताए ।

आफ्‌ना खेलाडीको सोचेअनुरुप प्रर्दशन गर्न नसक्दा फराकिलो हार बेहोर्नु परेको न्यु स्टारका प्रशिक्षक विनय चौधरीले बताए ।

मच्छिन्द्रका  सनिस श्रेष्ठ  प्लेयर अफ दि म्याच भए र १० हजार रुपैयाँ प्राप्त गरे । प्रतियोगितामा बुधवार चर्च ब्वाइज युनाइटेड र विराटनगर सिटी एफसी बिच खेल हुनेछ ।

प्रतियोगिताको विजेताले १० लाख ५ हजार ५ सय ५५ र दोस्रो टोलीले ५ लाख ५ हजार ५ सय ५५ रुपैयाँ  पाउनेछन् ।