बार्सिलोना (एजेन्सी) – लियोनल मेस्सीले ९० औँ मिनेटमा पेनाल्टीमा निर्णायक गोलले बार्सिलोनाले घरेलु मैदानमा लेगानेसलाई २-१ ले हराउदै ला लिगामा महत्वपुर्ण ३ अंक जोडेको छ । बार्सिलोनाको जितमा पहिलो गोल पनि अर्जेन्टिनी स्ट्राइकर मेस्सीले गरेका थिए ।
खेलको चौथो मिनेटमा मेस्सीले पहिलो गोल गरेका थिए । लुइस स्वारेजले दाँयाबाट दिएको राम्रो पासलाई ट्याप गर्दै मेस्सीले गोल गरेका हुन् ।
पहिलो हाफमा १ गोलको अग्रता लिएको बार्सिलोनाले ७१ औं मिनेटमा लेगानेसको विवादास्पद गोलमा अग्रता गुमायो । बार्सिलोनका फुल ब्याक सर्जी रोबर्टोलाई तान्दै बल खोसेपछि एन्जल गुरेरोले डार्विन माचिसलाई दिएको पास उनले सदुपयोग गर्दै ८९ बर्षमा पहिलो पटक ला लिगामा बढुवा भएको लेगानेसलाई खेलमा फर्काएका थिए ।
बार्सिलोना बराबरी उन्मुख खेलमा मार्टिन मान्टोभानीले नेमारलाई लडाउदा पाएको पेनाल्टीलाई मेस्सीले सदुपयोग गर्दै बार्सिलोनलाई ३ अंक दिलाए । शीर्षस्थानको रियल मड्रिड भन्दा २ खेल बढी खेलेपनि बार्सिलोना अझै १अंक कम छ ।
