सुनिल गाउँले, बारा

जीतपुरसिमरा गोल्डकपको आयोजक नव जन जागृती युवा क्लब सिमराको छैठौं अधिवेशनले नयाँ नेतृत्व चयन गरेको छ ।

सिमरा रंगशालामा निर्माण भइरहेको एकेडेमी भवनको सभाहलमा सोमवार भएको अधिवेशनले रामचन्द्र लामाको अध्यक्षतामा १७ सदस्यीय नयाँ कार्य समिति सर्वसम्मत चयन गरेको हो । यसअघि पनि लामा नै अध्यक्ष थिए।

कार्यसमितिको प्रथम उपाध्यक्षमा शंकर थापा, द्वितीय उपाध्यक्षमा राजदास श्रेष्ठ, महासचिवमा शम्भुसिंह ठकुरी, सचिवमा श्याम सुवेदी, कोषाध्यक्षमा शालिकराम अधिकारी चुनिए ।

सदस्यमा सुधिरजङ्ग राणा, शरदचन्द्र भट्टराई, नवराज न्यौपाने, इश्वर थपलीया, सन्तोष दाहाल, निराजन थापा, मनोज राई, विक्रम श्रेष्ठ, दिपक भट्टराई, रिता कँडेल र शेखर लामा चयन भएका छन् ।

त्यसअघि सम्पन्न क्लबको १७ औं बार्षिक साधारण सभाले क्लबको संस्थागत तथा आर्थिक प्रतिवेदन सर्वसम्मत पारित गरेको छ ।

साधारण सभााले विधान संसोधन लगायतका आवश्यक विषय सुझाव सहित पारित गरेको महासचिव ठकुरीले जानकारी दिए ।

जीतपुरसिमरा उपमहानगरपालिकाका नगर प्रमुख राजन पौडेलको मुख्य अतिथि रहेको बार्षिक साधारण सभामा नेपाल तेक्वान्दो महासंघका मधेश प्रदेश महासचिव राजकुमार लामा, नेपाल खेलकुद पत्रकार मञ्च बाराका अध्यक्ष शरदचन्द्र भट्टराई, क्लबका संरक्षक मुकुन्दबहादुर क्षेत्री, माओबादी नेता बेनीप्रसाद तिमल्सेना, नेपाली कांग्रेस जीतपुरसिमराका संस्थापक सभापति श्यामबाबु गुप्ता, इलाका प्रशासन कार्यालय सिमराका प्रमुख तेजराज शर्मा लगायतले सम्बोधन गरेका थिए ।