अर्जुन कार्की, बागलुङ

जिल्ला प्रहरी कार्यालय बागलुङ र संकल्प पुर्नस्थापना केन्द्र बुधवार बागलुङमा जारी दोस्रो स्मृति कप फुटबल प्रतियोगिताको सेमिफाइनलमा प्रवेश गरेका छन् ।

प्रहरीले नेपाली सेनाको श्रीमेहर गणलाई ३-१ र संकल्पले नेपाली सेनाकै नारायण दल गण मुस्ताङलाई ट्राइबेकरमा पराजित गर्दै सेमिफाइनलको यात्रा तय गरेका हुन् ।

राष्ट्रिय खेलाडीसहित मैदान उत्रिएको प्रहरीको लागि खेलको पाँचौं मिनेटमा केशर बलामले गोल गर्दै अग्रता दिलाए । पुलिसको लागि खेलको १२ औं मिनेटमा विवेक गुरुङले गोल गर्दै अग्रता दोब्बर बनाए ।

श्रीमेहरको लागि प्रकाश बानियाँले खेलको १७ औं मिनेटमा गोल गर्दै अग्रतालाई कम गराएका थिए । इन्ज्युरी समयमा प्रहरीका मनबहादुर विष्टले गोल गर्दै पुलिसको जित निश्चित गरे । पुलिसले राष्ट्रिय फुटबल टोलीका सदस्य रन्दिप पौडेललाई मैदानमा उतारेको थियो ।

यस्तै बुधबार भएको तेस्रो खेलमा संकल्पले नारायण दल गणलाई ट्राइबेकरमा ४–५ गोलले पराजित गर्यो ।
निर्धारित समयमा गोलरहित बराबरीमा सकिएपछि खेल ट्राइबेकरमा पुगेको थियो । ट्राइबेकरमा नारायण दलका धिरेन्द्र शाही, दिपक थापा र जग्दिश थारुले गोल गर्न सकेनन्।

नारायण दलको लागि सुनिल थारु, सुरेश थारु, लोकेश थापा र पुस्कार पौडेलले गोल गरे । संकल्पको लागि मुकुन्द न्यूरे, युनिस तामाङ, मनिष गुरुङ, बिशाल नेपाली र आयुष गुरुङले गोल गरे । पासाङ तामाङ र भागवत चौधारीको प्रहार बाहिरिएको थियो ।

दिनको पहिलो खेलमा रुद्रेपिपल युवा क्लबलाई ट्राइबेकरमा पराजित गर्दै प्रर्पल हेज क्वाटरफाइनलमा प्रवेश गरेको छ ।

राष्ट्रिय टोलीका सदस्य आयुष घलान सहित मैदान प्रवेश गरेको प्रर्पल हेज निर्धारित समयमा रुद्रेपिपलसँग २–२ गोलको बराबरीमा रोकिएको थियो ।

रुद्रेपिपलको लागि खेलको २३ औं मिनेटमा मिलन गिरीले गोल गरे । पहिलो हाफको इन्ज्युरी समयमा रुद्रेपिपलका सचिन गुरुङले आत्मघाती गोल गरेपछि खेलमा १-१ को बराबरी भयो ।

३८ औं मिनेटमा सामभेल सुनारले गोल गर्दै प्रर्पललाई २–१ को अग्रता दिलाए। ४९ औं मिनेटमा रुद्रेपिपलका आयुष थापाले गोल गरेपछि खेल पेनाल्टी सुटआउटमा धकेलिएको थियो ।

पेनाल्टीमा प्रर्पल हेजले रुद्रेपिपललाई ४–३ गोलले पराजित गर्यो । पेनाल्टीमा रुद्रेपिपलका सचिन गुरुङको प्रहार गोलपोष्टमा लाग्दै बाहिरियो भने आयुष थापाको प्रहार प्रर्पलका गोलरक्षकले बचाए ।

रुद्रेपिपलको लागि आशिष गुरुङ, मिलन गिरी र रोशन थापा मगरले गोल गरे । प्रर्पलको लागि सुजल श्रेष्ठ, अजित गुरुङ, रोशन दोङ र अनिष महर्जनले गोल गरे ।

प्रतियोगितामा बिहिवारको पहिलो खेल आदर्श विद्यामन्दिर र गुठी युनाइटेड तथा दोस्रो खेल चिल्ड्रेन लाईफ स्पोर्टस् क्लब र प्रर्पल हर्ज बिच हुने बागलुङ एकता क्लबका अध्यक्ष इन्सान थापाले बताए ।

प्रतियोगिताको विजेताले१ लाख २२ हजार २ सय २२ रुपैयाँ र दोस्रो हुने टोलीले ६६ हजार ६ सय ६६ रुपैयाँ प्राप्त गर्नेछ।