सुमन अधिकारी, बुटवल

भैरहवामा जारी रुपन्देही सुपरलिग क्रिकेट प्रतियोगिता अन्तर्गत ‘ए’ डिभिजनको मंगलबारको खेलमा लुम्बिनी खुकुरी क्लब विजयी भएको छ ।

खुकुरीले मेलवर्न क्रिकेट क्लब (एमसिसी)लाई ९७ रनले पराजित गरेको हो । सिद्धार्थ क्रिकेट मैदानमा टस हारेर ब्याटिङको निम्तो पाएको खुकुरीले निर्धारित ४१ ओभरको खेलमा ६ विकेट गुमाएर २ सय ३२ रनको बलियो योगफल बनाएको थियो ।

टोली लागि साहब आलमले अविजित ७२, कसेजाद आलमले ४८, जमिर अलीले ३६, निश्चल चौधरीले २०, शंकर रानाले १५ र प्रज्वल थापाले १२ रन बनाएका थिए ।

एमसीसीका अब्दुल हबिब र विपिन आचार्यले समान २ तथा रमेश कुर्मी र अरुण पाठकले समान १ विकेट लिएका थिए ।

जवाफी ब्याटिङ गरेको एमसिसी ३३.१ ओभरमा अलआउट हुँदै १ सय ३५ रन मात्रै बनाउन सक्यो । उसका लागि विपिन आचार्यले ४१, विजय प्रजापतीले २९, रमेश कुर्मीले २३ र सन्दीप रजालीले १८ रन बनाए पनि जितका लागि पर्याप्त भएन ।

बलिङमा खुकुरीका साहब आलम, सन्देश जिसी र अजयकुमार चौहानले समान ३ तथा दुर्गेश गुप्ताले १ विकेट लिए । खेलमा खुकुरीका साहब आलम प्लेयर अफ द म्याच घोषित भए ।

रुपन्देही क्रिकेट संघको आयोजनामा जारी प्रतियोगिताको विजेता टोलीले १ लाख १ रुपैयाँ र उपविजेताले ५० हजार १ रुपैयाँ नगदसहित ट्रफी प्राप्त गर्नेछ।