चितगोङ (हाम्रो खेलकुद) – लक्ष्मी हुन्डाई मनाङ मस्र्याङ्दी क्लबले शेख कमल अन्तर्रा्ष्ट्रिय क्लब कप–२०१७ को समूह चरणको दोस्रो खेलमा एक खेलाडी परिवर्तन गरेको छ । केही समयमा अफगानिस्तानी क्लब शाहिन आस्मयीविरुद्ध सुरु हुने खेलमा सामसनको ठाँउमा विक्रम लामाले मौका पाएका छन् भने बाँकी १० खेलाडी यथावत छन् । पहिलो खेलमा सुरुआती ११ मा रहेका विदेशी खेलाडी सामसन भने दोस्रो खेलमा बेन्चमा राखिएको छ । 

आइतबार भएको समूह चरणको पहिलो खेलमा निकालेको जितले हौसिएको मनाङ बुधबार शाहिन आस्मायीलाई हराउँदै सेमिफाइनल यात्रा सहज बनाउने लक्ष्य राखेको छ । दुईबीचको खेल नेपाली समय अनुसार दिउसो ३ः४५ बजेपछि चितगोङस्थित मोहम्मद अजिज रंगशालामा हुनेछ ।

मनाङलेले पहिलो खेलमा मोहमडन स्पोर्टिङ क्लबलाई २–० ले पराजित गर्दा ओलावाले ओलाडिपो अफिज र विशाल राईले गोल गरेका थिए । शाहिन आस्मयी भने पहिलो खेलमा आयोजक चितगोङ अवहनी लिमिटेडसँग ३–१ को हार बेहोरेको थियो । बुधबार समुह ‘बी’ को दोस्रो खेलमा आयोजक चितगोङ अवहनी लिमिटेड र मोहमोदेन स्पोर्टिङ क्लबबीच प्रतिस्पर्धा हुनेछ । मनाङले लगातार दोस्रो जित निकाले एक खेल अगावै सेमिफाइनलमा स्थान बनाउनेछ । खेल बराबरीमा रोकिए वा पराजित भए सेमिफाइनल प्रवेशका लागि दोस्रो खेलको नतिजा कुर्नुपर्ने हुन्छ ।

मनाङको पहिलो रोजाई- दिनेश थापामगर (गोलरक्षक), विराज महर्जन, कमल श्रेष्ठ, देवेन्द्र तामाङ, अदमा बो सिसिको (डिफेन्डर), विक्रम लामा, रोहित चन्द, विशाल राई, सुजल श्रेष्ठ, अनिल गुरुङ (मिडफिल्ड) र ओलावाले ओलाडिपो अफिज (फरवार्ड)