चितगोङ (हाम्रो खेलकुद) – लक्ष्मी हुन्डाई मनाङ मस्र्याङ्दी क्लब बंगलादेशमा जारी शेख कमल अन्तर्रा्ष्ट्रिय क्लब कप–२०१७ को सेमिफाइनल यात्रा कठिन मोडमा पुगेको छ।
समूह चरणको दोस्रो खेलमा अफगान क्लब शाहिन आस्मयीलाई ३–१ को नतिजा सुम्पिएपछि मनाङको अन्तिम चारको यात्रा कठिन बनेको छ । यद्दपी आयोजक चितगोङ अवहनी लिमिटेडसँग हुने समूह चरणको खेलको नतिजाले टोली अघि बढ्ने सम्भावना भने जीवित छ ।
शाहिनसँगको खेलमा मनाङ सुरुआतबाट दबाबमा परेको थियो । शाहिनका लागि कप्तान अमिरुद्धिन सरिफीले ह्याट्रिक पुरा गरेका थिए । मध्यान्तर हुन ७ मिनेट बाँकी रहँदा शाहिनले अग्रता लिएको थियो । अमिरुद्धिन सरिफीले उत्कृष्ट गोल गर्दे शहिनलाई अग्रता दिलाएका थिए । लगत्तै मनाङले बराबरीको मौका पाएपनि सफल हुन सकेन । कप्तान अनिल गुरुङ हेड प्रहार क्रसबारमा लागेर फर्केको थियो । त्यसअघि ३४ औं मिनेटमा गोलकिपर दीनेश थापामगरले खतरनाक आक्रमणलाई जोगाएका थिए । ३६ औं मिनेटमा अडामा बो सिसोको विपक्षी आक्रमणलाई निस्तेज पारेका थिए ।
दोस्रो हाफमा पनि अफगानी क्लबले आक्रमणलाई तेज पारेको थियो । ६५ औं मिनेटमा टोलीले गोलअन्तरलाई दोब्बर पारेको थियो । काउन्टर एट्याकमा कुनै मौका नदिइ दोस्रो गोल गरेका थिए । ७५ औं मिनेटमा पेनाल्टीमा गोल गर्दै सरिफीले ह्याट्रिक पुरा गरेका थिए । पेनाल्टी बक्समा सिसकोको बल ह्यान्ड भएपछि शाहिनले पेनाल्टी पाएको थियो । त्यसअघि ७२ औं मिनेटमा परिवर्तित खेलाडी बिमल बस्नेतले गोल फर्काउँदै मनाङलाई खेलमा फर्काउने प्रयास गरेका थिए ।
मनाङले पहिलो खेलमा मोहमडन स्पोर्टिङ क्लबलाई २–० ले पराजित गर्दा ओलावाले ओलाडिपो अफिज र विशाल राईले गोल गरेका थिए । शाहिन आस्मयी भने पहिलो खेलमा आयोजक चितगोङ अवहनी लिमिटेडसँग ३–१ को हार बेहोरेको थियो ।
