काठमाडौं (हाम्रो खेलकुद)- दोस्रो अन्तर विद्यालय सशस्त्र प्रहरी महानिरीक्षक रनिङ ट्रफी फुटबल प्रतियोगिता सुरु भएको छ।

विकास बोहोराले ५ गोल गरेको उद्घाटन खेलमा नेपाल एपिएफ स्कुल कीर्तिपुर ‘क’ ले पुष्प सदन बोर्डिङ स्कुललाई ९–० ले पराजित गर्यो।

एपिएफका विनम खम्चा, दिपेश गुरुङ, सागर खत्री र अमन भगतले समान १ गोल‌ गर। एपिएफका विकास प्लेयर अफ दि म्याच बने ।

नेपाल एपिएफ स्कुल कीर्तिपुरमा आइतवार सशस्त्र प्रहरी बल नेपाल मानवस्रोत विभाग प्रमुख एवम् विद्यालय व्यवस्थापन समिति अध्यक्ष सशस्त्र प्रहरी अतिरिक्त महानिरीक्षक (एआइजी) वंशीराज दाहालले प्रतियोगिताको उद्घाटन गरे ।

विद्यालयका समादेशक सशस्त्र प्रहरी वरिष्ठ उपरिक्षक भुपेन्द्र के.सीले धन्यवाद ज्ञापन गरेको उद्घाटनमा विद्यालयका प्रधानाचार्य युवराज पराजुलीले स्वागत मन्तव्य राखे ।

कीर्तिपुर नगरपालिका नगर प्रमुख कृष्णमान डंगोल, विद्यालय व्यवस्थापन समितिका पदाधिकारी, विद्यालयका प्रधानाध्यापक, अखिल नेपाल फुटबल संघका पदाधिकारीलगायतको उपस्थिति थियो।

प्रतियोगितामा उपत्यका (काठमाडौं, भक्तपुर र ललितपुर) १६, काभ्रेपलान्चोक र बाँकेको नेपाल एपिएफ कोहलपुरबाट १ गरि १८ विद्यालयका १९ टोलीको सहभागिता रहेको छ । लिग कम नकआउटका आधारमा प्रतियोगितामा सोमवार दुई खेल हुनेछन्।