पोखरा (हाम्रो खेलकुद)- १९ औं सफल पोखरा अन्तर्राष्ट्रिय म्याराथन अन्तर्गत व्हिल चियर तथा दृष्टिविहीन दौड प्रतियोगिता सम्पन्न भएको छ।

पोखरा रंगशालामा आज भएको पुरुष व्हिल चियर २ किलोमिटर दौडमा सन्तोष कार्कीले पहिलो भए। उनले ९ मिनेट ५१. २० सेकेन्डको टाईमिङमा दौड पूरा गरे।

दीपक आले मगर १० मिनेट ०१. ३६ सेकेन्डमा निर्धारित दूरी तय गर्दै दोस्रो भए। सुरेश जौली तेस्रो भए। उनले १० मिनेट ५१.२४ सेकेन्डमा दौड पूरा गरे।

महिला व्हिल चियर १ किलोमिटर दौडमा सृजना सार्की पहिलो स्थान प्राप्त गर्न सफल भइन् । उनले ६ मिनेट १६. ५१ सेकेन्डमा दौड पूरा गरिन्।

हिमा कुमारी लम्साल दोस्रो र पुनम विक तेस्रो भइन्। हिमाले ६ मिनेट ५३. ५० सेकेन्डमा र १० मिनेट १२. १३ सेकेन्डको टाईमिङमा दौड सकाए।

प्रतियोगिताको महिला दृष्टिविहीन ८० मिटर दौडमा विनिता पुन पहिलो भइन्। उनले १३.७० सेकेन्डमा दूरी तय गरिन्। देवि बराल दोस्रो भइन्। उनले १५.०५ सेकेन्डको टाईमिङ निकालिन्। १६.२३ सेकेन्डमा दौड सकाएकी सचिना सुवेदी तेस्रो भइन्।

पुरुष दृष्टिविहीन ८० मिटर दौडमा जीवन थापा पहिलो भए। रोषी लोहनी दोस्रो र विरेन्द्र लामिछाने तेस्रो स्थानमा दौड पूरा गरे।

भूतपूर्व खेलाडी मन्च, पोखराको आयोजनामा फागुन ३ गते १९ औं सफल पोखरा अन्तर्राष्ट्रिय म्याराथन हुनेछ। जहाँ पुरुष म्याराथन र महिला हाफ म्याराथन लगायत विभिन्न स्पर्धामा प्रतिस्पर्धा हुनेछ।