पोखरा (हाम्रो खेलकुद)- खेलको अन्त्यतिर राज भुषालको निर्णायक गोलमा चर्च ब्वाईज युनाइटेड पोखरामा जारी २४ औं आहा! रारा पोखरा गोल्ड कपको सेमिफाइनलमा प्रवेश गरेको छ।

पोखरा रगंशालामा सोमवार तेस्रो क्वाटरफाइनलमा साविक विजेता त्रिभुवन आर्मी फुटबल क्लबलाई १-० ले हराउँदै चर्च ब्वाईजले अन्तिम चारमा स्थान पक्का गरेको हो।

८९औं नविन लामाको कर्नरमा राजले पोष्टको अगाडि हेडर गोल गर्दै टोलीलाई सेमिफाइनलको यात्रा तय गराए। जारी प्रतियोगिताबाट बाहिरिने पूर्व विजेतामा आर्मी चौथो टोली बनेको छ ।

साविक विजेता आर्मीसँगै यसअघि दुई पटकको विजेता संकटा क्लब, आयोजक सहारा क्लब र एपिएफ प्रतियोगिताबाट बाहिरिसकेका छन्।

चर्च ब्वाइजले अब फाइनल प्रवेशका लागि ६ पटकको विजेता नेपाल पुलिस क्लबको सामना गर्नेछ। पुलिसले ब्रिगेड ब्वाइज क्लब युकेलाई हराउँदै सेमिफाइनलमा स्थान बनाएको थियो।

पहिलो हाफको पाचौँ मिनेटमा चर्च ब्वाईजका नविनको फ्रिकिक मिलन राईको हेडर क्रसबार माथिबाट आकाशियो। २१ औं मिनेटमा आर्मीका दिनेश हेम्जनको हेडर आकाशियो।

२३ औं मिनेटमा चर्च ब्वाईजका नविनको फ्रिकिक मिलनको हेडर पहिलो बारको नजिकबाट बाहिरिदा अग्रता बनाउने मौका गुमायो। २६ औं मिनेटमा नविनको फ्रिकिक अबायोमी फाकु्न्लेको हेडर आकाशियो।

प्रतियोगिताको अन्तिम क्वाटरफाइनलमा मंगलवार थन्डरबोल्ट नर्थ युनाईटेड सिक्कीम र उज्वेकिस्तानको ब्ल्याक बुल्स एफसीबिच हुनेछ।