हिमाल खरेल, बिर्तामोड

अर्जुनधारा नगरपालिकाको टोली अप्रत्यासित नतिजा निकाल्दै झापाको बिर्तामोडमा जारी प्रथम झापा जिल्ला अन्तरपालिका महिला फुटबलको सेमिफाइनलमा पुगेको छ ।

बिर्तामोडस्थित डोमालाल राजवंशी रंगशालामा आज भएको दोस्रो क्वाटरफाइनलमा झापा गाउँपालिकालाई १६-० गोलको वर्षा गर्दै अर्जुनधाराले अन्तिम चारमा पुगेको हो ।

एक पक्षीय खेलमा अर्जुनधाराका लागि जेनिफर मगर एक्लैले ५ गोल गरिन् । त्यस्तै, मेनुका मगरले पनि ह्याट्रिक पूरा गरिन् ।

सुरुवाती गोल जेनिफरले खेलको छैटौं मिनेटमै गरेकी थिइन् । उनले खेलको ४० औँ मिनेटसम्म ह्याट्रिक पूरा गरेकी थिइन् ।

दोस्रो गोल १३ औं मिनेटमा गरेकी जेनिफरले फेरि ३८ औं र ४६औँ मिनेटमा थप गोल गरिन् । उनी सर्वाधिक गोल गर्ने खेलाडीको सुचीमा शीर्ष स्थानमा छिन् ।
जेनिफर पहिलो खेलमा दमक नगरपालिकाविरुद्ध ५ गोल गरेकी थिइन् ।

मेनुकाले खेलको ११, ३५ र ५५ औँ मिनेटमा गोल गर्दै ह्याट्रिक पूरा गरेकी थिइन् । कुसुम खतिवडा, मञ्जलीकुमारी योञ्जन र मन्जिला योङहाङले समान २ गोल गरे।

कुसुमले खेलको १७ र १९ औँ, मञ्जलीले ३४ र ३६ औँ तथा मन्जिलाले खेलको ४२ र ५२ औँ मिनेटमा गोल गरेकी हुन् ।

त्यस्तै, रेनु लिम्बूले खेलका ४५ औँ मिनेटमा गोल गरेकी थिइन् भने एक गोल आत्मघातीस्वरुप उपहार पाएको थियो ।

प्लेयर अफ दि म्याच बनेकी अर्जुनधाराकी कुसुम खतिवडाले ५ हजार रुपैयाँ प्राप्त गरिन्। कमल गाउँपालिका र मेचीनगर नगरपालिकाबिच बुधवार तेस्रो क्वाटरफाइनल खेल्नेछन् ।

फागुन ५ गते हुने फाइनल खेलको विजेताले ३ लाखसहित ट्रफी र दोस्रो टोलीले १ लाख ५० हजार रुपैयाँ प्राप्त गर्नेछ ।