पोखरा (हाम्रो खेलकुद)- सिजनको पहिलो नकआउट खेल्ने क्रममा पोखरा आएको थ्री स्टार क्लबले विजयी सुरुवात गरेको थियो। त्यो जितले थ्री स्टार २४ औं आहा! रारा पोखरा गोल्डकपको सेमिफाइनलमा पुगेको थियो।

बलियो मानिएको मच्छिन्द्र फुटबल क्लबलाई पेनाल्टीमा ४-२ ले हराउँदै अघि बढेको थ्री स्टारले त्यो भन्दा बलियो चुनौतीको सामना सम्भवतः आजको खेलमा गर्नुपर्ने हुनसक्छ।

जहाँ ५ पटकको विजेता थ्री स्टारले पहिलो पटक आहा रारामा भाग लिएको उज्वेकिस्तानको ब्ल्याक बुल्स एफसीको सामना गर्नेछ।

ब्ल्याक बुल्सले भारत सिक्किमको थन्डरबोल्ट नर्थ युनाइटेडलाई ३-० ले हराउँदै थ्री स्टारसँगको भेट पक्का गरेको थियो। आहा राराको दुई पटकको च्याम्पियन संकटा क्लबलाई ३-१ ले हराएर थन्डरबोल्ट क्वाटरफाइनलमा पुगेको थियो।

तर उज्वेक टोलीले थन्डरबोल्टलाई त्यहाँबाट अघि बढ्न दिएन । थ्री स्टार र ब्ल्याक बुल्सबिचको विजेताले शनिवार नेपाल पुलिस क्लबसँग फाइनल खेल्नेछ।

६ पटकको विजेता पुलिस जारी आहा रारामा लगातार ३ खेल जित्दै उपाधि नजिक पुगेको हो । पुलिसको यो कीर्तिमानी ११ औं फाइनल यात्रा हो । टोली ५ वर्षपछि फाइनल पुग्न सफल भएको हो।

आज थ्री स्टार विजयी भएको खण्डमा टोली आठौं पटक फाइनल पुग्नेछ। पुलिस र थ्रीस्टारले यसअघि आहा रारामा एक पटक मात्र २०७४ मा फाइनल खेलेका थिए।