काठमाडौं (हाम्रो खेलकुद) – नेपाल सुपर लिग (एनएसएल) को साविक विजेता ललितपुर सिटी फुटबल क्लबले गत सिजन उपाधि जित्दा टोलीको महत्त्वपूर्ण सदस्य रहेका सनिश श्रेष्ठ र आदित्य शाक्यलाई रिटेन गरेको छ ।

एनएसएल आयोजक नेपाल स्पोर्ट्स एण्ड इभेन्ट म्यानजेमेन्ट (एनएसइएम) ले अक्सन मिति र रिटेन गर्ने प्रावधान घोषणा गरेको भोलिपल्ट नै ललितपुरले खेलाडी रिटेन गरेको जानकारी दिएको छ । ए श्रेणीबाट सनिश र बी श्रेणीबाट आदित्यलाई टोलीले रिटेन गरेको हो । सनिश राष्ट्रिय टोलीका नियमित सदस्य हुन् भने आदित्य गत सिजन फाइनलको -प्लेयर अफ द म्याच चुनिएका थिए । दुवै हाल मछिन्द्र क्लबबाट मोफसलका प्रतियोगिता खेलिरहेका छन् ।

ललितपुरले मार्की खेलाडीमा पनि अनन्त तामाङलाई नै निरन्तरता दिने तयारी गरिरहेको छ । यद्यपि त्यसको अधिकारिक घोषणा भने भइसकेको छैन । अनन्त हाल चर्च ब्वाइज युनाइटेडको कप्तान रहेका छन् । उनी ए डिभिजन लिग र एनएसएलको दुवै वर्तमान च्याम्पियन टोलीका कप्तान हुन् ।

ललितपुरले यस सिजन प्रशिक्षकको भूमिकामा इंग्लिस फुटबलमा भरपुर अनुभव बोकेका साइमन ग्रेसनलाई मुख्य प्रशिक्षकमा भित्र्याइसकेको छ । गत सिजन अष्ट्रेलियन इयान गिलानले टोलीलाई उपाधि दिलाएका थिए ।

यो पनि पढ्नुहोस : एनएसएल अक्सनको मिति तय