हिमाल खरेल,भद्रपुर

आयोजकको टोली भद्रपुर ब्लेजर्स सौर्य एअर ओम साई पाथिभरा हस्पिटल गम्भीर राई स्मृति संस्करण भद्रपुर झापा गोल्डकप अन्तर्राष्ट्रिय आमन्त्रण नकआउट फुटबल प्रतियोगिताको सेमिफाइनलमा पुगेको छ ।

भद्रपुरस्थित मेची रंगशालामा आज भएको पहिलो क्वार्टर फाइनलमा मिलन राईको २ गोलमा भद्रपुरले विभागीय टोली नेपाल पुलिस क्लबलाई २- १ ले पराजित गर्दै अन्तिम चारमा प्रवेश गरेको हो ।

आहा रारा पोखरा गोल्डकप फुटबल प्रतियोगिताको फाइनलमा पराजित भएर झापा पुगेको पुलिस टोली यहाँ पहिलो खेलबाटै बाहिरिएको छ।

सबै गोल दोस्रो हाफमा सम्भव भयो । खेलको ७२ औं मिनेटमा मिलनले गोल गर्दै भद्रपुरलाई अग्रता दिलाए । आशिष चापागाईंले पेनाल्टी एरिया नजिकैबाट दिएको पासमा मिलनले गोल गरे । खेलको ७४ औं मिनेटमा भद्रपुरले पेनाल्टीमा गोल थप्दै खेल २-० को अग्रता बनायो ।

भद्रपुरका आशिषलाई पुलिसका मानबहादुर परियारले पेनाल्टी एरियामा फाउल गरेपछि मिलनले अवसरको सदुपयोग गरे । इन्ज्युरी पुलिसले एक गोल फर्कायो । भद्रपुरका किपर जियारत शेख चुकेपछि प्रशान्त कुँवरले गोल गरे ।

भद्रपुरले खेलमा गोल केही अवसर गुमायो । ४० औं मिनेटमा पेनाल्टी एरियाबाट मिलनले प्रहार गरेको बल फर्स्ट बारमा लागेर फर्कियो । ४५ औं पुलिसका गोलकिपर अमित टमाटा बिट भएपछि मिलनको प्रहार गोललाइनमा पुलिसका हेमन्त श्रेष्ठले उत्कृष्ट बचाउ गरे ।

इन्ज्युरी समयमा विदेशी खेलाडी फोडे फोफोनाले पेनाल्टी एरियाबाट प्रहार गरेको बल पुलिसका किपर अमितले रोके ।

५४ औं मिनेटमा पुलिसका अनुप लिम्बूको हेडर भद्रपुरका किपर जियारतले पञ्च गरे । कृष्ण गुरूङको क्रस पासमा पेनाल्टी एरियाबाट अनुपले हेड गरेका थिए । विजयी टोलीका मिलन राई प्लेयर अफ द म्याच चुनिएर उनले २१ हजार रुपैयाँसहित ट्रफी पाए ।

भद्रपुरका सहायक प्रशिक्षक अर्जुन राईले पहिलो हाफ गोलरहित बराबरीमा टुंगिएपछि दोस्रो हाफमा रणनीति बनाएर पुलिसमाथि जित दर्ता गरेको बताए । घरेलु टिम र दर्शकका साथका कारण खेलाडीले राम्रो प्रदर्शन गरेको उनले बताए।

पुलिसका प्रशिक्षक सुमन सुवेदीले खेलाडीले राम्रो प्रदर्शन गरे पनि डिफेन्समा चुक्दा हार बेहोर्नु परेको बताए । जित्ने योजनाका साथ मैदानमा उत्रिए पनि सानो गल्तीले चुकेको उनको भनाइ थियो ।

शनिबार दोस्रो क्वाटरफाइनलमा झापा ११ एफसी र चर्च ब्वाईच युनाइटेडबीच प्रतिस्पर्धा हुनेछ। मछिन्द्रलाई हराउँदै झापा क्वार्टर फाइनलमा प्रवेश गरेका हो । चर्च ब्वाइजले सोझै क्वाटरफाइनलमा खेल्दैछ।

गोल्डकपको विजेताले १३ लाख र दोस्रो टोलीले ७ लाख रुपैयाँ प्राप्त गर्नेछ। एकजना दर्शकले महेन्द्ररत्न स्टोर बिर्तामोडका तर्फबाट एक थान हिमस्टार टिभी, एयरपोर्ट होटलका तर्फबाट एकजना दर्शकले दुईजनाको डिनर र सुनचाँदी व्यवसायी संघ भद्रपुर शाखाको तर्फबाट दुईवटा चाँदीको सिक्का पाए ।