काठमाडौं (हाम्रो खेलकुद)- झन्डै दुई‌ वर्षदेखि सहिद स्मारक ए डिभिजन लिग गर्न नसकेका कारण अखिल नेपाल फुटबल संघ (एन्फा) को नेतृत्वको आलोचना हुने गरेको छ।

एन्फाले गरेको पछिल्लो ए डिभिजन लिग यता नेपाल सुपर लिग (एनएसएल) लगातार दोस्रो पटक आयोजना गर्ने तयारी जोडतोडले चलिरहेको छ।

आंशिक रुपमा घरेलु फुटबलमा आशाको सन्चार गर्न सफल एनएसएलको तेस्रो संस्करणका लागि शनिवार भएको खेलाडीको मिनी अक्सनमा एन्फा पदाधिकारी उपस्थिति नहुनुलाई चासोको साथ हेरिएको छ।

फ्रेन्चाइज लिगका लागि अक्सन महत्वपूर्ण कार्यक्रम मध्येमा पर्छ । आफैले स्वीकृती दिएको एनएसएलको अक्सनमा एन्फा पदाधिकारीको अनुपस्थितिले शंका गर्नेलाई ठाँउ दिएको‌ छ।

मिनी अक्सन नाम दिएको ‘ए’ र ‘बी’ गरी कुल ६० खेलाडीको अक्सन भएको थियो। अक्सनमा अन्य खेललागायत विभिन्न क्षेत्रका व्यक्तित्वको उपस्थिति थियो। नेपाल क्रिकेट संघ (क्यान) का सचिव पारस खड्का पनि अक्सनमा अतिथिको रुपमा पुगे।

तर नेपाली फुटबलको कार्यकारी सर्वोच्च निकाय एन्फा पदाधिकारीको उपस्थिति नै रहेन । यसअघिको अक्सनमा एन्फा पदाधिकारीको उपस्थिति रहन्थ्यो।

एन्फाले नेपाल स्पोर्ट्स एण्ड म्यानेजमेन्टबाट एनएसएल आयोजनाको लागि वार्षिक शुल्क पनि लिने सम्झौता छ।तर एन्फा कुनै पदाधिकारीको त्यहाँ उपस्थित रहेन । एन्फाका प्रतियोगिता निर्देशक सञ्जिव मिश्र भने अतिथिका‌ रुपमा अक्सनमा सहभागी भए।

एन्फा पदाधिकारीको उपस्थिति किन भएन भनेर हाम्रो खेलकुदको प्रश्नमा नेपाल स्पोर्ट्स एण्ड म्यानेजमेन्टका प्रबन्ध निर्देशक श्रीयांश कार्कीले एन्फा अध्यक्ष पंकज विक्रम नेम्वाङलाई निमन्त्रणा गरिएको तर वहाँ काठमाडौं बाहिर हुनुभएकोले उपस्थित हुन नसकेको जवाफफ दिए।

यद्दपी कार्कीले एन्फासँगको सहकार्यमा कुनै समस्या नरहेको पनि प्रष्ट पारे ।