काठमाडौं (हाम्रो खेलकुद)- फोर नेसन्स उमन्स इन्टरनेसनल च्याम्पियनसिपमा लिग चरणको अन्तिम खेलमा फाइनल पुगिसकेका नेपाल र म्यानमार आज भिड्दै छन्।

दशरथ रंगशालामा साँझ ६ बजे खेल सुरु हुनेछ। आजको खेलको नतिजाले लिग चरणको विजेता र उपविजेताको निर्णय गर्नेछ। नेपाल र म्यानमार दुवै लगातारको दोस्रो जितमा एक खेल अघि नै फाइनलमा पुगेका हुन्।

जारी च्याम्पियनसिपमा सहभागी चारै टिमले समान २ खेल खेलिसक्दा सबैभन्दा बलियो टोलीको रुपमा म्यानमारलाई देखिएको छ।

म्यानमारले २ खेलमा ८ गोल गर्दा १ गोल खाएको छ। पहिलो खेलमा लेबनानलाई ३-१ ले हराएको म्यानमारले दोस्रो खेलमा कीर्गिस्तानलाई ५-० ले पराजित गरेको थियो। दोस्रो खेलमा म्यानमारले अधिकांश दोस्रो रोजाइको खेलाडी उतारेको थियो।

म्यानमारले गरेको गोल र मैदानमा देखाएको प्रभावशाली प्रदर्शनको कारण बलियो टोली विरुद्ध नेपालले संगठित भएर खेल्नु पर्नेछ।

नेपालले पनि म्यानमारले जस्तै लगातार २ खेल जितेको छ। नेपालले पहिलो खेलमा कीर्गिस्तानलाई १-० ले र दोस्रो खेलमा लेबनान विरूद्ध पनि १-० को साँघुरो जित निकालेको थियो।

दुई खेलमा नेपालको फ्रन्ट नाइनले मजबुत प्रदर्शन गर्न सकेको छैन । नेपालले च्याम्पियनसिप अगाडि नेपालको बलियो पक्ष फरवार्ड लाइन भन्दै आएको थियो। किनकी सावित्रा भण्डारी ‘साम्बा’ ले युरोपमा र रेखा पौडेलले युएईमा लिग खेलिरहेका छिन्।

तर कनेक्सन र कम्बिनेशनमा समस्या देखिएको छ। सँगै प्रशिक्षण गर्न नपाएर यस्तो भैरहेको साम्बालाे बताएकी थिइन्।

फाइनल अगाडिको भिडन्तको नतिजाले खास अर्थ नराख्ने भएकोले दुवै टिमका प्रशिक्षकले आजको खेलमा ‌प्रयोग भने गर्न सक्छन्।

फिफा वरियतामा म्यानमार नेपाल भन्दा ४८ स्थान माथि रहेको छ। म्यानमार ५५ र नेपाल १ सय ३ स्थानमा छ।

यसअघि नेपालले म्यानमारसँग दुई पटक एएफसी वुमन्स ओलम्पिक क्वालिफाईङमा खेलेको छ। जहाँ नेपाल एक पटक म्यानमारसँग ३-१ ले हार्दा एक खेल १-१ को बराबरीमा सकिएको थियो। आज नेपाललाई म्यानमारलाई पहिलो पटक हराउने अवसर पनि रहेको छ।

आजै हुने पहिलो खेलमा लिग चरणबाट बाहिरिसकेका कीर्गिस्तान र लेबनानबीच प्रतिस्पर्धा हुनेछ। खेल दिउँसो २ बजे सुरु हुनेछ।