काठमाडौं (हाम्रो खेलकुद)- फोर नेसन्स उमन्स इन्टरनेसनल च्याम्पियनसिपमा नेपाल र म्यानमारको खेल जारी छ। पहिलो हाफमा नेपाल र म्यानमारबीचको खेल २-२ को बराबरीमा सकिएको छ।

खेलको छैठौं मिनेटमा नै घरेलु टिम र दर्शकलाई स्तब्ध बनाउँदै म्यानमारले अग्रता बनायो। सविता राना मगरले स्वे यी तुनलाई फाउल हानेपछि म्यानमारले फ्रि-किक प्राप्त गर्यो। जहाँ म्याट नोइ खिनले फ्रि-किकमा सीधै गोल गरिन्।

तर ११ औं मिनेटमा नेपालले खेललाई १-१ को बराबरीमा पुर्यायो। सावित्रा भण्डारी ‘साम्बा’ ले एकल प्रतासमा अगाडि बढाएर दिएको सटिक पासमा सविताले पेनाल्टी बक्सबाट ट्याप इन गर्दै बललाई सही दिशा दिइन्।

सविताको यो तेस्रो अन्तराष्ट्रिय गोल हो। यसअघि उनले वाफ, साफ च्याम्पियनसीपमा एक-एक गोल गरेकी थिइन्।

बराबरी गोल फर्काएर खेललाई रोमाञ्चक बनाएको नेपाल १६ औं मिनेटमा दोस्रो गोल बेहोर्यो। डिफेन्सिभ इरर प्रमुख कारण बन्यो।

तीन डिफेन्डरलाई जिल्लाउँदै मे टेट लुले गोल गरिन्। उनको जारी च्याम्पियनसिपमा यो तेस्रो गोल हो। यो सँगै नेपाललाई म्यानमारले २-१ ले पछि पार्यो।

तर ४१ औं मिनेटमा प्रीति राईको उत्कृष्ट पासमा साम्बाले डि बक्स भित्रबाट आकर्षक गोल गरिन्। यो सँगै पहिलो हाफ २-२ को बराबरीमा सकियो।

आजको खेलमा प्रशिक्षक राजेन्द्र तामाङले प्लेइङ इलेभेनमा तीन खेलाडी परिवर्तन गरे। कप्तान तथा गोल किपर एञ्जिला तुम्बाप्पो सुब्बाको स्थानमा अन्जना राना मगर, स्ट्राइकर रेखा पौडेलको स्थानमा रश्मिकुमारी घिसिङ र विमला चौधरीको स्थानमा सरू लिम्बुलाई मैदानमा उतारेका थिए।

म्यानमार र नेपाल दुवै फाइनलमा पुगिसकेका छन्। आजको नतिजाले लिग चरणको विजेता र उप विजेताको टुङ्गो लाग्नेछ। यसअघि नेपाल र म्यानमार दुवैले लेबनान र कीर्गिस्तानलाई हराउँदै फाइनलमा पुगेका थिए।