काठमाडौं (हाम्रो खेलकुद)- संकटा क्लबलाई २-१ गोल अन्तरले हराउँदै त्रिभुवन आर्मी फुटबल क्लब केपी ओली कपको फाइलनमा प्रवेश गरेको छ।

आर्मी जारी सिजन कुनै पनि प्रतियोगिताको फाइनलमा पुगेको यो पहिलो पटक हो। आर्मीको जितमा नवयुग श्रेष्ठ र दिनेश हेन्जनले गोल गरे। संकटाको लागि विसन गुरुङले सान्त्वना गोल गरे।

दशरथ रंगशालामा आज भएको खेलमा आर्मीले सुरुवातमा नै अग्रता बनायो। खेलको आठौं मिनेटमा जिलेस्पी जङ्ग कार्कीको उत्कृष्ट एसिस्ट‌मा क्लोज रेन्जबाट नवयुगले गोल गरे। पहिलो हाफ आर्मीको पक्षमा १-० को अग्रतामा सकियो।

संकटालाई विरुद्ध ६६ औं मिनेटमा आर्मीले अग्रता दोब्बर बनायो। अभिषेक लामाले आर्मीका जिलेस्पीलाई पेनाल्टी बक्सभित्र लाडाए। रेफ्रीले पेनाल्टीको अवसर आर्मीलाई दिए। जहाँ दिनेश हेन्जानले पेनाल्टीमा कुनै गल्ती गरेनन्।‌ आर्मीले २-० को अग्रता बनायो।

निर्धारित ९० मिनेटको खेल २-० को नतिजामा सकियो। थप गरिएको ५ मिनेटको इन्ज्युरी समयको तेस्रो मिनेटमा संकाटाले एक गोल फर्कायो।

सुनिल खड्काले बक्सभित्रबाट हानेको प्रहार पोलमा लागेर फर्कियो। रिबाउन्डमा विसन गुरुङले गोल गरे। यो गोलले गोल अन्तर मात्र घटायो। आर्मी २-१ को जितमा फाइनलको यात्रा तय गर्न सफल रहयो।

प्रतियोगिताको दोस्रो सेमिफाइनल खेल भोलि हुनेछ। आयोजक केपी एफसीले फाइनल प्रवेशका लागि मछिन्द्र एफसीको सामना गर्नेछ। फाइनल फागुन १९ गते हुनेछ।
प्रतियोगिताको विजेताले १५ लाख ११ हजार ११ हजार १ सय ११ र उपविजेताले ५ लाख रुपैयाँ प्राप्त गर्नेछ।