हिमाल खरेल, बिर्तामोड

पाँचौ मेचीनगर गोल्डकप अन्तर्राष्ट्रिय आमन्त्रण नकआउट फुटबल प्रतियोगितामा उज्वेकिस्तान ब्ल्याक बुल्स एफसी सहभागी हुने पक्का भएको छ ।

नेपालमा पहिलोपटक आएको ब्ल्याक बुल्सले २४ औं आहा रारा पोखरा गोल्डकपको उपाधि जितेको थियो ।
सोही टोली काँकरभिट्टा आउने निश्चित भएको आयोजक काँकरभिट्टा फुटबल ट्रेनिङ सेन्टरका सल्लाहकार शेरबहादुर बस्नेतले हाम्रो खेलकुदलाई जानकारी दिए ।

आयोजकले यसअघि मेचीनगर गोल्डकपमा सहभागी हुने ८ टोलीबारे जानकारी दिए पनि उज्वेकिस्तानको ल्याउने भएपछि जर्जियन युनाइटेड दार्जिलिङ भारतलाई सहभागी नगराउने भएको छ ।

यसैबीच मेचीनगर गोल्डकपको तयारी तीव्र गतिमा भइरहेसँगै खेलतालिका भोलि सार्वजनिक गरिने आयोजक काँकरभिट्टा फुटबल ट्रेनिङ सेन्टरका उपाध्यक्ष अशोक राईले बताए ।

उपाध्यक्ष राईका अनुसार प्रतियोगितामा ब्ल्याक बुल्ससहित अब चर्च ब्वाइज युनाइटेड, मछिन्द्र एफसी, एपिएफ एफसी, धरान फुटबल क्लब, एनएसएल टिम झापा एफसी , आयोजक काँकरभिट्टा फुटबल ट्रेनिङ सेन्टर तथा भारतको ग्लोबल फुटबल क्लब आसाम सहभागिता रहनेछ।

चैत २ गते फाइनल हुने प्रतियोगिताको विजेताले १० लाख र दोस्रो हुने टोलीले ५ लाख रुपैयाँ प्राप्त गर्नेछन्।
प्रतियोगिताको सर्वोत्कृष्ट खेलाडीले ५१ हजार र उच्च गोलकर्ताले २५ हजार रुपैयाँ पाउनेछन् ।

उत्कृष्ट प्रशिक्षक र गोलकिपरले २१ हजार र उदीयमान खेलाडीले ११ हजार , प्रत्येक दिनको प्लेयर अफ म्याचले ११ हजार रुपैयाँ पाउनेछन् ।

मेचीनगर नगरपालिका संरक्षक रहेको प्रतियोगिताको मुख्य प्रायोजक धुलाबारीको होटल मेची क्राउन रहेको छ ।