हिमाल खरेल,बिर्तामोड

पाँचौं मेचीनगर गोल्डकप अन्तर्राष्ट्रिय आमन्त्रण नकआउट फुटबल प्रतियोगिताको उद्घाटन खेल शनिवार आयोजक काँकरभिट्टा फुटबल ट्रेनिङ सेन्टर र भारतको जर्जियन एफसीबिच हुने भएको छ ।

आयोजकका सल्लाहकार शेरबहादुर बस्नेतका अनुसार दोस्रो दिन फागुन २५ गते ए डिभिजन लिग विजेता चर्च ब्वाइज युनाइटेडले एनएसएल टिम झापा एफसीको सामना गर्नेछ ।

त्यस्तै, तेस्रो क्वार्टर फाइनल खेल फागुन २६ गते उज्बेकिस्तानको ब्ल्याक बुल्स फुटबल क्लबले धरान फुटबल क्लबसँग प्रतिस्पर्धा गर्नेछ ।

फागुन २७ गते अन्तिम क्वार्टर फाइनलमा एपिएफ एफसीले मछिन्द्र फुटबल क्लबसँग सेमिफाइनल प्रवेशका लागि खेल्नेछ ।

चैत २ गते हुने फाइनल खेलको विजेताले १० लाख र दोस्रो टोलीले ५ लाख, ट्रफी र मेडल प्राप्त गर्ने सेन्टरका उपाध्यक्ष अशोक राईले बताए ।

प्रतियोगिताको सर्वोत्कृष्ट खेलाडीले ५१, उच्च गोलकर्ताले २५ हजार ,उत्कृष्ट प्रशिक्षक र गोलकिपरले समान २१ , उदीयमान खेलाडीले ११, प्रत्येक खेलको प्लेयर अफ म्याचले ११ हजार रुपैयाँ र ट्रफी पाउनेछन् ।

मेचीनगर नगरपालिका संरक्षक रहेको प्रतियोगिताको मुख्य प्रायोजक धुलाबारीको होटल मेची क्राउन रहेको क्लबका अध्यक्ष नवराज ओलीले जानकारी दिए ।