एजेन्सी – दस खेलाडीमा समेटिए पनि स्पानिस क्लब बार्सिलोनाले बेन्फिका विरुद्ध १-० को कठिन जित निकालेको छ। बार्सिलोनाको जितमा राफिन्हाको मात्र गोल निर्णायक बन्यो।

खेलको २२औं मिनेटमा नै बार्सिलोना १० जनामा समेटियो। युवा खेलाडी पाउ कुबार्सीले बेन्फिकाका स्ट्राइकर भ्याङ्गेलिस पाभ्लिडिसलाई पेनाल्टी बक्सको छेउमै लडाए। रेफ्रीले उनलाई सीधै रातो कार्ड दिए। पहिलो हाफ गोल रहित बराबरीमा सकियो।

यसपछि ६१ औं मिनेटमा बार्सिलोनाले अग्रता बनायो। राफिन्हाले बेन्फिकाको डिफेन्सिभ इररको फाइदा उठाउँदै गोल गरे। उनको यो सिजनको २५औं तथा च्याम्पियन्स लिगम नवौं गोल हो।

जनवरीमा समूह चरणमा यी दुई टोली भिड्दा पनि राफिन्हाले पाँच पटकको च्याम्पियन बार्सिलोनालाई जित दिलाएका थिए। उनले ९६ औं मिनेटमा निर्णायक गोल गर्दै रोमाञ्चक ९ गोलको खेलमा टोलीलाई जित दिलाएका थिए।

बार्सिलोना र बेन्फिकाबीचको दोस्रो लेग मंगलवार क्याम्प नाउमा हुनेछ।

पिएसजीको हार

लिभरपुलले च्याम्पियन्स लिग अन्तिम १६ को पहिलो लेगमा पेरिस सेन्ट जर्मेन (पिएसजी) लाई १-० ले हरायो।
खेलमा पूर्ण नियन्त्रणमा लिनका बाबजुद पिएसजी गोल गर्न असफल रह्यो।

२७ वटा प्रहार गर्दा पनि पिएसजीले गोलको खाता खोल्न सकेन । लिभरपुलका गोलकिपर एलिसनले नौं वटा प्रहार विफल बनाए । लिभरपुलले दोस्रो प्रयासमै गोल गरेर नतिजा आफ्नो पक्षमा पार्यो । खेल सकिन ३ मिनेट बाँकी रहँदा गोल गर्यो ।

मोहम्मद सलाहको ठाँउमा मैदान प्रवेश गरेका हर्वी इलियटले आफ्नो पहिलो टचमै गोल गरे । डार्विन नुनेजले दिएको सुन्दर पासमा उनले गोल गरेका हुन्।
दोस्रो लेग मंगलवार लिभरपुलको आफ्नो मैदानमा हुनेछ।

अन्य खेलमा बायर्न म्युनिख र इन्टर मिलान विजयी भएका छन्। इन्टरले फेयनोर्डलाई २-० र बायर्नले बुन्डेसलिगा प्रतिद्वन्द्वी बायर लेभरकुसनलाई ३-०ले हरायो ।