हिमाल खरेल,बिर्तामोड

विराटनगर सिटी एफसीलाई सडनडेथमा हराउँदै इलामको रेड हर्स एफसी झापाको तेस्रो बुट्टाबारी च्यालेन्ज कप फुटबल प्रतियोगिताको सेमिफाइनलमा प्रवेश गरेको छ ।

बिर्तामोड–६ स्थित हरियाली खेलमैदानमा बिहीवार भएको तेस्रो क्वार्टरफाइनलमा निर्धारित समय र टाइब्रेकरमा पनि बराबरी भएपछि सडन डेथमा रेड हर्सले बाजी मार्यो ।

टाइब्रेकरमा ३-३ को बराबरीपछि खेल सडनडेथमा पुगेको थियो। समग्रमा रेड हर्स ४- ३ विजयी भयो ।
त्यसअघि निर्धारित समयमा ३–३ गोलको बराबरी भएपछि खेल टाइब्रेकरमा धकेलिएको थियो ।

खेलको सुरुवातमा रेड हर्सले अग्रता लिएको थियो । खेलको ३१ औँ मिनेटमा मिङमा गुरुङले गोल गरे ।
तर, खेलको ४० औँ मिनेटमा गोल गर्दै विराटनगरका निवास फुयालले खेल बराबरीमा ल्याए ।

निवासले ६० औँ मिनेटमा गोल गर्दै खेल २–१ को स्थितिमा पुर्याए । खेलको ७५ औँ मिनेटमा हरि खवासले गोल थप्दै विराटनगरले ३-१ अग्रता बनायो।

तर, खेलको अन्त्यमा रेड हर्सका सङगे शेर्पा र विवेक सुनवारले गोल गर्दै खेल ३–३ गोलको बराबरीमा पुर्याए । सङगेले ७७ औँ र विवेकले ७८ औँ मिनेटमा गोल गरे ।

रेड हर्सका गोलकिपर निशान दनुवार प्लेयर अफ दि म्याच घोषित भए । उनले ३ हजार रुपैयाँ र ट्रफी पाए । उनलाई प्रमुख अतिथि झापा जिल्ला फुटबल संघका अध्यक्ष भगिरथ आले मामा, बिर्तामोड ६ का वडा अध्यक्ष सूर्यप्रसाद कन्दङवा, आयोजकका अध्यक्ष हिमाल कन्दङवा लगायतले पुरस्कार प्रदान गरे ।

आज अन्तिम क्वाटरफाइनल न्यु स्टार एफसी सुनसरी र बगान युथ क्लब कचनकवलबीच हुने आयोजक बुट्टाबारी युनाईटेड क्लबका कोषाध्यक्ष बाबुराम बस्नेतले जानकारी दिए ।