हिमाल खरेल,बिर्तामोड

इलामको रेड हर्स फुटबल क्लबलाई रोक्दै आयोजक टोली तेस्रो बुट्टाबारी च्यालेन्ज कप फुटबल प्रतियोगिताको फाइनलमा प्रवेश गरेको छ ।

बिर्तामोड–६ स्थित हरियाली खेलमैदानमा आज भएको पहिलो सेमिफाइनल खेलमा रेड हर्स एफसीलाई ३-० ले हराउँदै आयोजक बुट्टाबारी युनाइटेड क्लब उपाधिनजिक पुगेको हो ।

आयोजक टोलीले खेलको सुरुवातमै दुई गोल गरेको थियो भने एक गोल खेलको अन्त्यतिर थपेको हो । खेलमा एकतर्फी दबाब दिएको बुट्टाबारीका लागि खेलको तेस्रो मिनेटमा विजय राईले गोल गरे ।

त्यस्तै, खेलको छैटौँ मिनेटमा रोशन धिमालले गोल गर्दै खेल २-० को स्थितिमा पुर्याए । खेलको ७६ औँ मिनेटमा किरण गुरुङको गोलमा आयोजकले ३-० को जित निकालेको हो ।

खेलको प्लेयर अफ द म्याच बुट्टाबारीका अभिषेक चौधरी भए । उनले ३ हजार रुपैयाँ र ट्रफी पाए । उनलाई आजको खेलकी अध्यक्ष तथा क्लबकी सहसचिव एलिजा पोखरेल लगायतले गरे ।

भोलिको अन्तिम सेमिफाइनल खेल शनिश्चरे फुटबल क्लब अर्जुनधारा र बगान युथ क्लब कचनकवलबीच हुने आयोजक बुट्टाबारी युनाईटेड क्लबका कोषाध्यक्ष बाबुराम बस्नेतले जानकारी दिए ।

प्रतियोगिताको विजेताले २ लाख २ हजार २ सय २२ र दोस्रो टोलीले १ लाख १ हजार १ सय ११ रुपैयाँ प्राप्त गर्नेछ।