सूर्य शुभचिन्तक, वीरगञ्ज

विभागीय टोली नेपाल पुलिस क्लबले लगातार दोस्रो पटक वीरगञ्ज गोल्डकपको उपाधि जितेको छ ।

आदर्शनगर रंगशालामा शनिवार मच्छिन्द्र फुटबल क्लबलाई पेनाल्टी सुटआउटमा ३-० ले पराजित गर्दै पुलिसले उपाधि रक्षा गरेको हो।

निर्धारित समय १-१ को बराबरीमा टुङ्गिएको थियो। खेलमा अग्रता मछिन्द्रले लिएको थियो। १२औ समिरराज थोकरले गोल गरेका थिए।

५८औँ मिनेटमा विकास वि.क.ले गोल गर्दै पुलिसलाई खेलमा फर्काएका थिए। विकास दोस्रो हाफमा मैदान प्रवेश गरेका थिए।

टाइब्रेकरमा पुलिसका कप्तान रामचन्द्र वाजी, संजीव लामा, गोलकिपर अमित टामाटाले गोल गरे । उज्वल राईले प्रहार बाहिरिएको थियो ।

मच्छिन्द्रको कुनै प्रहार सफल भएन । विशाल तामाङ र दिवाकर चौधरीको प्रहार बाहिरिएको थियो। समिरराजको प्रहार पुलिसका गोलकिपर अमितले रोकेका थिए। फाइनलको प्लेयर अफ दि म्याच समिराजले १० हजार रुपैयाँ प्राप्त गरे।

विजेता पुलिसले उपाधिसहित ११ लाख ११ हजार १ सय ११ र मच्छिन्द्रले ५ लाख ५५ हजार ५ सय ५५ रुपैयाँ प्राप्त गर्यो।

पुलिसका कप्तान रामचन्द्र वाजी प्रतियोगिताको सर्वोत्कृष्ट उत्कृष्ट खेलाडी घोषित भए र उनले विद्युतीय स्कुटर पाए ।

पुलिस क्लबका अमित टामाटा उत्कृष्ट गोलकिपर, चेतन घिमिरे उत्कृष्ट प्रशिक्षक घोषित भए । उनीहरुले समान २० हजार रुपैयाँ प्राप्त गरे।